Lyngba ka (SRWP) yn pynioh ka MLA haduh 10 lakh ïa ki skul hapoh ka District
Ki bor District jong ka East Jaintia Hills District, Khliehriat mynta ka sngi nyngkong, ki la pynlong ia ka jingpynkup burom ia ki nonghikai jong ki Klass 8, 9 bad 10 hapoh ka project “Ka Lawei”. Ia kane ka program la pynlong ha Auditorium Hall jong ka Don Bosco College, Byndihati, East Jaintia Hills District.
U myntri ka tnat jong ka pule jong ka Jylla u Rakkam A. Sangma, u la long u kongsan, katba ka kong Santa Mary Shylla, MLA jong ka Sutnga Saipung kum ka symbud kongsan ha kaba la iadonlang ruh u bah H. M. Shangpliang, Advisor jong ka sorkar Meghalaya, Education Department, u Deputy Commissioner, East Jaintia Hills District, A. Baranwal, IAS, bah G. Warjri, MCS, ADC, EJHD, kong P. Dkhar, District School Education Office, Father. George. Lyngkhoi, Principal Don Bosco College, Byndihati, ki samla pule bad ki nonghikai.
Ka project “Ka Lawei” kaba la tip kum ka Digital Learning, la sdang ha kane ka District Administration of East Jaintia Hills District da ka jingthmu ban ai lad ia ki samla pule kiba pule sha ki thain kiba jngai na ki jaka sor ha ka ban wanrah ia ka rukom jinghikai kaba iadei bad ki jaka sor.
Ha ka jingiadei bad kane la plie ruh haduh la pynioh ruh ia ki karma class (Digital Smart class rooms) ha ki 50 ki skul ha kane ka District.
U kongsan haba ai jingkren mynta ka sngi u la ong ba ka jingnang jingstad ka long kawei na ki mat kaba donkam eh ia u ne ka briew bad ia ha ka imlang ka sahlang la ha shnong ha thaw, ha ka jylla bad ha ka ri hi baroh kawei, kaba long kum ka wei na ki atiar ha kino kino ki jingiakhun ha kane ka juk kaba mynta.
U la ong ruh ba katkum ka jingthum jong kane ka Lawei Project, kaba iadei ban beh ia ka thong ha ka liang jingtip lyngba ki digital learning, kan ai ne pynioh shibun ki jingmyntoi ia ki nonghikai kumjuh ruh ia ki khynnah bad ki samla pule.
Na ka liang ka kong Santa Mary Shylla ka la pyntip ruh ba lyngba ka Special Rural Works Programme (SRWP) yn pynioh haduh 10 lakh tyngka sha ki skul jong ka District na ka bynta ban pynbiang ia ka bor ding na ka bynta ban lait na ka jingthuh haka jingiadei bad ka light.
