Ka President jong ka ri India ka Droupadi Murmu mynta ka sngi kala pynkup burom Padma Shri ia u bah Risingbor Kurkalang na ka jylla Meghalaya ha ka liang ka put ka tem ha ka jingialang Civil Investiture Ceremony kaba la pynlong ha nongbah New Delhi.
Ia u bah Risingbor Kurkalang la tip bad ithuh bha kum uwei na nongshna ia ki tiar put tiar tem tynrai bad ruh u nongthaw sur tynrai ba paw bha. Ia u la kha ha ka 19 tarik u Naiwieng, 1978 na ki kmie ki kpa kiba long ki nongrep ha ka shnong Laitkyrhong kaba hap hapoh East Khasi Hills District. U bah Risingbor ula sdang ban shna bad die iew iaki tiar tem jong u naduh u snem 2001 bad u dei u ba nyngkong eh napoh ka shnong Laitkyrhong uba lah ban thaw ne shna ia ki tiar put tiar tem tynrai.
U bah Risingbor ula ju ioh ruh shibun jait ki khusnam hapoh ka District bad ha ka jylla hi ruh.