[LA PYNBNA IA KI TARIK BAN PYNLONG IA KI SHAD NIAM BEHDEINKHLAM 2022 JONG KI SAW RAIJ]
U Doloi ka Elaka Jwai Wh. Puramon Kynjin namar ka jingsngewnguh bad sngewburom ia ki nongkitkam jong ki Soo Raij-Soo Langdoh kiba la shakri ia ki kam niam la 15 snem lynter hynnin ka sngi (Muchai 26 tarik Kmaichonglad 2021) ha ka Dorbar ki Soo Langdoh kaba la pynlong ha madan Lariang, ha shnong Ialong ula pynkup burom ia kitei ki nongkikam, ha ka jingiasakhih lang jong ki nongialam jong ki Seinraij ba kyntup ia ka Seinraij Jwai, Seiñraij Chyrmang, Seiñraij Tuber bad Seiñraij Ialong.
Ia ka jingialang ha katei ka sngi la pyniaid da u ma Raymon Nyrtiang u Pator Raij Jwai.
Ki nongkitkam niam jong ki Soo Langdoh kiba la shah pynkup burom ki kynthup ia ka Kongka Siangbood bad u Samboon Siangbood kiba long ka Langdoh bad u Langdoh ka Raij Jwai, u Dr. H.C. Pakynteiñ (Sangot Pakynteiñ), u Valentideo Paswet (Sangot Paswet), u Niyooki Shadap Passah (Maji), u Long Passah (Harna) bad u Tribal Toi (Dhulia) nangta u Paka Shylla (Tymmen Shylla) jong ka Raij u Kongwasan Chyrmang, u Kiang Phawa, (Tymmen Raij) jong ka Raij Tuber bad u Khain War (Tymmen Papiah) Raij Ialong.
La don ruh ka jingpynkup burom ia nongialam jong ki Soo Raij ba kynthup ia u ma Arwotki Sumer, General Secretary, Seiñraij Jwai, u Ker Lakiang, Secretary Seiñraij Chyrmang, u H. Phawa, President Seiñraij Tuber wa u Pyrkhat Shylla, President Seiñraij Ialong.
Na ka liang jong u Pa Dolloi kum u khlieh ka niam bad khlieh jong ka Elaka ula ai ki kyntien sneng kyntien kraw bad kyntu ia kine ki nongkitkam bad ki dei ban don ka mynsiem iatreilang bad ka jingiaieit markylliang.
Ha kane ka Dorbar la pynskhem ruh ia ki sngi ban pynlong ia ka shad niam Behdeiñkhlam jong u snem 2022 jong kine ki Saw tylli ki Raij.
Ka Raij Chyrmang kan pynlong ia ka shad Behdeiñkhlam ha ka 1 u bnai May, ka Raij Jwai kan pynlong ha ka 14 tarik u July, ka Raij Tuber kan pynlong ha ka 22 tarik u July bad ka Raij Ialong kan pynlong ia kane ka shad Behdeiñkhlam ha ka 7 tarik u August 2022.
