U MLA ka 2-Jowai Constituency u ma Wailadmiki Shylla mynta ka sngi ula pynkup burom ïa ki samla pule kiba wan shakhmat na kane ka Constituency ha ka MBOSE-2023 bad kyrpang ïa kito ki samla pule kiba la shah hikai haka slem “SSLC Free Coaching Program 2022” ïa kaba la kyrshan jingïarap da u MLA hi.
Mynta ka sngi ïa kane ka prokram ‘Felicitation Award 2023’ la pynlong ha Thomas Jones Synod College Jowai, ha ka jingdonlang ka symbud kongan kong A. P. Syiem District School Education Officer WJHD, u Principal la College Dr. D.G. Lyngdoh, u Principal ka North Liberty School Richard Uriah, u Chairman ka JMB ma Lasooki Lakiang, ma Abul Phawa, ma Lakhon Dkhar (MDC), ma O. Lamin (Nomination MDC), ki nonghikai bad ki samla pule Class-10.
Ha kane ka sngi la pynkup burom ïa ki saw ngut ki Top 10 bad Top 20 ha ka HSSLC bad SSLC jong ka result MBOSE-2023 bad kiba dei ruh ki samla pule napoh kane Jowai Constituency, la pynkup burom kumjuh ïa ki 15 ngut ki samla pule kiba shah hikai ha ka Free Coaching Class jong u MLA.
U MLA ma Wailadmiki Shylla ha ka jingkren ula pynsngew sha ki samla pule ba kin don ka thong haka jingim haba leh ïa kano kano ka kam bad kin pynleit jingmut bah ha ka jingpule kot.
U ong ka jingwanrah ïa kum kine ki jaka ai jinghikai ei, kan ïarap ïa kiwei de ki samla pule kiba wan na ki longïing ba duk ki ban ïakhun ïa ka exam matrik, namar bunsien kiba duk kim ïoh lad ban leit Tuition namar ka jingrem dor.
Ha ka juh ka por ula kular ba kane ka jingai jinghikai ka dang ïai bteng manla u snem katba u dang long kum u MLA, ka jingdon kum kine ki jaka ai jinghikai kan ïarap ban ïoh shibun ki jingtip lyngba ki nonghikai hapoh kine ki Coaching Class, ong u MLA.
Shuh shuh ula kular kum ka dak ban pynshlur ïa ki samla pule kiba wan shakhmat ha kine ki sngi ban wan, un sa ai noh da ki Laptop bad ki samla pule kiba ïoh ïa kane ki lah ruh ban jied lada ki kwah ban shim da ka pisa.
Ka kong A.P. Syiem ha ka jingkren ka pynpaw ba ka West Jaiñtia Hills District ka dei kawei na ki District kaba shait wan sha khmat ha ki Exam jong ka MBOSE bad kane ka long ka jingsarong kaba khraw eh ïa ka ophis DSEO bad ïa ka District hi baroh kawei.
Ïa ka jingïalang ha kane ka sngi la pynïaid da u Hynñiewki Pasleiñ bad ïa ki kyntien pdiang la ai da u samla E. Suting bad ki kyntien ai khublei na u ma Octomewot Lamin.
