Ka Klob Shillong Lajong ka la ioh ban jam sha ka semi final jong ka lympung Meghalaya State League (MSL) lyngba ka jingjop da 3-1 kol pyrshah ia ka Rangdajied United kaba dei ruh ka lahduh jong kane ka lympung ha ka aiom ba la dep.
Ia kane ka lympung ba la pyniaid da ka Meghalaya Football Association (MFA), la bteng biang mynta hadien 2 bnai na ka jingdon jong ka lympung Santosh Trophy ha Guwahati.
Ha katei ka jingiakhun ka Rangdajied ka la ioh ban pynkhih jar nyngkong lyngba u Ieitlang Syiemlieh ha ka minit ba 4. Na ka bynta ka Lajong ia ki 2 kol la ioh ban thep da u Iohborlang Lyngkhoi ha ka minit ba 7 bad 62 katba ia ka shi kol la kum thep hi (own goal) da u rangialehkai ka Rangdajied, u Manbhakupar Iawphniaw ha ka minit ba 87.
Ka jingiakhun quarter final ba ar na ka bynta kane ka lympung kan bteng biang ha ka 11 tarik mynta u bnai ha kaba ka Sutnga SS&CC kan aireng pyrshah ia ka Ladthadlaboh SC ha madan Diengshynrum Artificial Turf, Khliehriat.
