Ka Nartiang Presbyterian Higher Secondary School kaba la rakhe baroh shisnem ka la pynkut ia ka jingrakhe jingdap sanphewsnem (Golden Jubilee) jong ka hynne ka sngi 9 tarik Nohprah 2025, ha kaba la wan ban pynkut ia kane ka jingrakhe da u Myntri Rangbah ka Jylla u Conrad K. Sangma kum u kongsan bad u ma Sniawbhalang Dhar Symbud Myntri Rangbah uba long ruh u MLA ka thain u Symbud kongsan.
Ha kane ka sngi shwa ban sdang ia ka Programe la ioh ia ka jingrwai ieit Ri (National Anthem) da ki Samla pule jong ka skul, ka jingpule na ka jyngthoh bakhuid( Baibel) da ka Kong I.J.R. Tongper kaba long ka Principal jong ka Skul bad ka jingkren pdiang sngewbha ia baroh da u Tymmen Basan. H. Khynriam uba long ruh u Chairman jong ka School (SMC). La pule ia ka Memorandum da u Secretary SMC bad ai ha u kongsan ia kiba ka skul ka la kdew ia ki mat jingiarap ba kongsan ia kane ka skul.
U Myntri Rangbah, u Conrad K. Sangma haba kren ha kane ka sngi, u pynpaw ia ka jingkmen kaba khraw haba u la ioh kane ka lad ban wan sha Nartiang ban pynkut ia kane ka jingrakhe jingdap sanphewsnem (Golden Jubilee) jong ka Nartiang Presbyterian Higher Secondary School wat hapdeng ki jingbun jong ki programe kiba u dei ban don. Haba kren ha kane ka jingialang u ai khublei ia baroh ki nong pyniaid ia kane ka skul bad ia baroh kito kiba donkti ha kaba pynkhreh ia kane ka programe ban pynkut ia kane ka sngi rakhe jingdap sanphewsnem kane ka skul (Nartiang Presbyterian Higher Secondary School Modop).
U Conrad K. Sangma u la ong ba ha ka jingiaid lynti jong kane ka skul ha kine ki sanphewsnem ka la pynmih shibun ki ‘rang bad ki ‘thei pule jong ka shnong Nartiang bad ki shnong kiba marjan kiba wan pule ha kane ka skul. Nangta u ong ka skul bad ka jingnang jingstad ka long kaba donkam ha ka juk mynta ym tang ban nang ka thoh ka pule ka kheiñ ka diah ka hikai ruh ia ka Akor ka Burom ha ka longbriew manbriew.
Shuh shuh u Conrad K. Sangma, u ong na baroh ki Jylla ka North East kum ka Tripura, Mizoram, Manipur bad Nagaland ka Meghalaya ka dei kaba bun eh ki skul. Ka Meghalaya ka don haduh 14,000 tylli ki Skul bad 25 hajar ngur ki Nonghikai, hynrei pat kumba 206 tylli ki skul kiba duna ki Nonghikai bad kumba 200 tylli pat ki skul kiba ym don khynnah skul. Nangta u ong ha Meghalaya ki don ki skul kiba don haduh 5-6 ngut ki Nonghgikai kiba tang 5-6 ngut ki khynnah bad kane ka jinglong jingman ka pynpyrkhat ia ka sorkar.
Haba kren ia ka jingdawa jong ki Nonghikai ban pynkiew tulop bad ban siew ia ka tulop jong ki Nonghikai, u ong ka sorkar kan pyrshang katlah katiai ban siew katba lah ei la kumno kumno ha shwa jong kane ka Khristmas ban shuh shuh u Myntri Rangbah. Nangta u ong ia kum ba long mynta kiba bun ki skul ki hikai tang ia ka Art stream, khlem ka Science bad ka sorkar jong u kan pyrshang katba lah ban pynbun ym tang ia ka Arts Stream hynrei ia ka Science ruh de namar ki Samla pule jong ka Jylla ki donkam ia ka Science stream ha ki skul jong kiba don hapoh ka jylla.
Haba kren shaphang ka jingeh jong ki Samla pule kiba shu iasah iingwai bad hatieng teng kim ioh iingwai, ka sorkar ka la shimkhia bad la donkam ban shna ia ki Hostel na ka bynta ban pynsuk ia ki samla pule ban shong ban sah pynkut u Myntri Rangbah. Ha ka juh ka por kum ka dak ban nangpyniaid ia kane ka Higher Secondary School, u la nohsynniang Rs.25 lak tyngka na ka bynta ki jingdonkam ba kyrkieh jong kane ka skul.
Kham hashwa la ioh ia ka jingkren kaba sngewtynnat, ka sneng ka kraw bad ka kyntu ka kynpham na u ma Sniawbhalang Dhar Symbud Myntri Rangbah bad uba long ruh u MLA ka thaiñ. Ha kane ka sngi ka skul ka la pynkup burom ruh ia ki khynnah skul barim (Past pupils) jong kane ka skul kiba bat mynta ha ki kyrdan treikam ki bapher bapher bad ia ki samla pule kiba pass bha na kane ka skul.
Ia ka Golden Jubilee Souvenir la pyllait paidbah da u ma Thombor Shiwat, Chief Executive Member (CEM) ka Jaintia Hills Autonomous District Council uba long ruh u MDC ka thaiñ.
