Mynta ka sngi ka 22 tarik u bnai Naitung 2025 ka Seiñ Raij Tuber ka la ïoh ban pyndep ïa ka jingleh Niam Behdeiñkhlam kaba ju leh man la ka snem. Ha kane ka sngi la wan ban sakhi da ki paidbah na kylleng ka bri u Hynniewtrep bad ruh kumjuh ki nongmih khmat ba pher bapher.
Ha kane ka sngi pynkut ïa ka leh niam Behdeiñkhlam ka Sein Raij Tuber la wan ban sakhi naduh u Myntri ka Sorkar jylla U Bah Kyrmen Shylla uba dei ruh u Local MLA ka Khliehriat, U Bah Shakliar Warjri U Myntri ba peit ïa ka Sports, U Ma Wailadmiki Shylla U MLA ka Jowai, Ka Kong Santa Mary Shylla MLA Ka Sutnga, U CEM ka JHADC u Ma Thombor Shiwat, Deputy CEM Ka JHADC, SP ka West Jaiñtia Hills District, Ki Pa Dalloi bad kiwei kiwei de ki Riew Rangbah bad ki Riewpawkhmat ka Jylla.
U Bah Kyrmen Shylla haba ïoh ban ai ïa ka jingkren ha kane ka sngi u ong ba kumba nga, nga iohi ia kawei ka rong kaba la wan rah mynta kaba thoh “Ngi hap ban iada na u Drugs Bad Ka HIV – nga ruh nga kwah ban pynpaw bad pynsngew hangne ba ka khlam kaba kham ma shuh shuh ka dei ka Khlam HIV bad u drugs bad kumba long mynta ka East Jaiñtia District ka bat ïa ka kyrdan ha ka jingbun kiba ïoh ïa kine ki jingpang bad lada ngi kum ki paidbah kiba don hangne ngi kloi ban iatrei lang ngi lah ban pynduh ia kane ka jingpang kaba buh jingma ïa ka lawei jong ka District” ula ban shuh shuh.
