Ka Smit Area Sports Association (SASA) ka la pynkut noh ia ka lympung ‘1st Football League Tournament 2024’ kaba dei ruh ka lympung ba nyngkong ba ka pyniaid da ka SASA hynne ka sngi ha madan Krisimai Minit Stadium, Smit.
Ha katei ka jingkhang pyrda ia kane ka lympung, la wan ban don ryngkat da u Bah Banteidor Lyngdoh, MLA Mawkynrew Constituency, u President jong ka Meghalaya Football Association (MFA) Bah Hamlet Dohling, ki Nongïalam Shnong bad kiwei kiwei.
Kum ka jingaimynsiem ia ka SASA ban nang kyntiew shuh shuh ia ka kam ïalehkai ha ka thaiñ bad ruh ban nang pynkylla dur ia ka imlang sahlang, u Bah Banteidor u la noh ka jingïarap sha katei ka kynhun kaba la shim ia kane ka sienjam ban kyntiew ia ka sap ki samla.
Na ka liang u President ka MFA, u la ai Khublei kyrpang ia ka SASA kaba shimkhia ban pynurlong bad pyndep ia kane ka thong “Nga ai Khublei ia ka Smit Area Sports Association kaba la pynlong ia kane ka league. Ka jingkhublei kyrpang ruh ia baroh ki kynhun kiba la shim bynta ha kane ka lympung, khamtam ia ka Umphrup SC kaba la long ka lahduh jong kane ka lympung 2024. Nang iaid Shaphrang SASA ban kyntiew ia ki samla ha ki kam ba bha”.
Ha katei ka jingiakhun final, ka Umphrup SC ka la ioh ia ka kabu ban rah ia ka nam lahduh lyngba ka jingjop da 2-0 pyrshah ia ka Lumkynsai SC lyngba ka kol u Damanglin Nongbri ha ka minit ba 8 bad 32.
