Ka Sub-Divisional Officer (Supply), Amlarem Sub-Division ka la pynbna paidbah ba kat kum ka hukum ba la pynmih da ka Supreme Court jong ka Sorkar India, baroh ki nongbam khaw NFSA (AAY & PHH) ki dei ban pyndep noh ia ka eKYC hapoh jong ka 30 tarik u bnai June 2025.
Ha kaba iadei bad kane, la buh ia ki kyndon ba hap ban leh; kata baroh ki Waheh Shnong ki dei ban pynbna paidbah bad ban pynsngewthuh ia ka jingdonkam jong ka eKYC sha ki nongbam khaw rashon bad ruh ban pynthikna ba ki dei ban pyndep ia kane ka kam hapoh katei ka por ba la buh da ka Sorkar India.
La pyntip ba katkum ka Section 17 jong ka Meghalaya Food Security Rules 2018, baroh ki nongbam khaw ki dei ban pyndep ia ka eKYC khnang ban iai bteng ia ka jingmyntoi jong ka jingioh khaw na ka Sorkar lyngba ka scheme NFSA.
La bthah ia ki Fair Price Shops Dealers ki dei ban plié ia ka dukan sam khaw man la ka sngi khnang ba ki paidbah ba thmu ban leh ia ka eKYC kin lah ban pyndep ha ka por ba biang.