Ka Awakening India Movement (AIM) ka kynhun kaba ïeng na ka bynta ka eh ka shon jong u paidbah halor ka jingthmu jong ka sorkar ban pynbor ban leh ia u Aadhaar la ki dei ki khynnah skul ne ki khynnah leit class bad kumjuh wat ia ki paidbah kiba shong ba sah ha sor ne ha ki thaiñ nongkyndong.
Kane ka kynhun kaba la thmu ban pynlong ia ka jingialang ha Barik ha ka 7 tarik ïaiong ka la pynkynriah noh sha ka 9 tarik namar ba ka don ka shad Weiking jong ka Seng Khasi. Kumta na ka liang ka kynhun ka kyntu bad ka khot ka wer ia baroh ki paidbah nongshong shnong jong ka Jylla khamtam ia kito kiba shah pynbor bad shah pynduh ka hok jong ki tang na ka daw u Aadhaar ba kin wan sha ka jingialang jong ka kynhun Awakening India Movement ha ka 9 tarik Ïaiong ha Barik naduh ka por 10 baje mynstep ban pynshai haba iadei bad u Aadhar.
Ha kane ka sngi na ka liang ka kynhun ba kynthup ia u Chairman ka Awakening India Movement u Bah Banshai Marbaniang un ai jingkren ban pynsngewthuh bad pynshai shuh shuh haba iadei bad u Aadhaar bad ka jingshah pynbor ki paidbah nongshong shnong ka Jylla ban leh ia u Aadhar.
Kane ka long ka kyrwoh na u Bah Banshai Marbaniang Chairman ka kynhun Awakening India Movement.