Ia ki Ticket Lucky Draw jong ka Fete shnong Mookyrdup Jowai, ka ban long ha ka 10 tarik u October 2025, la pynlait paidbah da u ma Awhai Andrew Shullai uba dei u Local MDC jong ka Jowai North, ha ka jingialang paidbah kaba la long ha Iingdorbar jong ka shnong myn ha kane ka 5 tarik September 2025. Ka daw ka jingpynlong ia kane ka Fete shnong la maitphang da u ma Pyrkhat Shylla uba long ruh u Waheh shnong jong ka shnong Mookyrdup.
U ma Shullai haba kren ha kane ka sngi u ong, ka shnong Mookyrdup haba ia nujor bad kiwei ki Dong ne ki shnong jong ka Sor Jowai, ka dang long ka shnong kaba dangthymmai bad kaba dang donkam ha baroh ki liang ban pynbha pynmiat ia ka shnong ka thaw bad khamtam ia ka ïingdorbar jong ka shnong ban shu shaniah tang na ka jingiarap na ka Sorkar lyngba ki Nongmihkhmat kam biang bad la donkam ban don ki Food fest, ki Mini-fete bad ki fete ban pynmih fund katba ka mih na ka bynta ki jingdonkam jong ka shnong.
Shuh shuh u ma Shullai haba kren ha kane ka sngi u kyntu ia ki nongshong shnong bad ia ki paralok parajor kiba hajan bad ha jngai ban iathied ia kine ki Tiket jong ka Lucky Draw ba ka jingmih kat kaba ka mih ka long ban pynbha ia ka ïingdorbar jong ka shnong. Nangta u ong haba u iohi hi dalade ia ka jingdonkam ban pynbha ia ka ïingdorbar jong ka shnong, u la pynthikna ba na ka liang jong u kum u Local MDC, un thaw ki lad ki lynti katba lah ei ban iarap ia kane ka jingdonkam ba kyrkieh jong ka shnong Mookyrdup ban pynbha ia ka ïingdorbar shnong jong ka.
