U MLA ka Sutnga-Saipung Constituency ma Shitlang Pale ha ka sngi Saitjaiñ ula wan ban pynhap pyrda ïa ka lympung ïalehkai phutbol ka Phramer Youth Cultural & Sports Club (PYC&SC), ba la tip kum ka ‘1st Inter Dong Promotion Invitation Football Tournament-2021’ kaba la sdang naduh ka 25 tarik u Risaw bad kut mynta ka sngi 31 tarik ha madan Ruiong (Phramer) West Jaiñtia Hills District.
Hashwa ban sdang jong ka jingïalehkai phainal la pynlong ïa ka jingïalang ba la pynïaid da u ma Meliyo Lyngdoh ha ka jingdonlang u symbud kongsan ma Sevenborn Tang, u MDC ka Shangpung ma Treilang Suchiang, President ka PYCSC Budki Suchiang, u ma Morningstar Lyngdoh Organizing Secretary bad kiwei de.
U kongsan ma Shitlang Pale haba ai jingkren ula ai ka jingïaroh ïa ki bor pynïaid jong kane ka lympung kiba don ka mynsiem ban kyntiew ïa ka sap ka phong jong ki khun samla ka thaiñ, ula kular ban shimkhia ban ïakren bad u MP ka Shillong ma Vincent H. Pala na ka bynta ban pynïoh jingïarap ha ka ban pynbha pynmiat ïa katei ka madan ïalehkai phutbol.
Ki kynhun kiba la wan ïashim bynta ha kane ka lympung ki don 32 tylli bad ha ka jingïakhun phainal mynta ka sngi saitjain la wan ban aireng hapeng ka 7 Brother FC pyrshah ïa ka Madanthad Youth Cultural Sports Club (MYCSC).
Haka jingïakhun jong ka kylla step ym shem la don mano mano ba ïoh thep kol, hynrei tad haduh ka kyllamiet ka MYCSC kala ïoh ban pynkhih ïa ka jar hashwa ban kut jong ka por ïalehkai lyngba ka penalty ba la thep da u Aplang Buam (Jersy No- 10) lyngba kane ka shikol kala pynlong ïa ka kynhun MYCSC ban rah syndon ïa ka nam lahduh jong kane ka lympung ïalehkai mynta u snem da kaba pynliem da 1-0 ïa ka 7 Brother FC.
Ïa ki khusnam sha ki nongjop la sam da ki nongpynïaid (PYC&SC) bad ki riew rangbah jong ka thiañ ka kynhuh lahduh ka la ïoh ïa ka song pisa kaba 30 hajar tyngka lem bad ka trophy, katba ka kynhun ba wan ba ar ka la ïoh rong 20 hajar tyngka lem bad ka Trophy.
Ia ka nam Best Goalkeeper la ïoh da u Deimiki Rabon, ïa ka nam Best player bad Top Scorers la ïoh da u Ricky Suchiang, katba ïa ka nam Best Discipline Team la ïoh da ka kynhun Private FC.
Lyngba kane ka lympung ‘1st Inter dong Promotion Invitation Football Tournament-2021’ yn sa jied ïa ki rangïalekai kiba kynsai tam na ka bynta ban ai jinghikai (coaching) ïa ki khnang ba kin ïoh ban leit ïashim bynta ha kiwei pat ki lympung ba kham shalor.
