Ka Ummulong Cricket Club kala lah ban pyliem da 152 runs ïa ka West Jaiñtia Police Cricket Club ha ka jingïalehkai jong ka District Cricket League 2024 bala pynïaid daka West Jaiñtia Hills District Cricket Association ha Madan Khliehtyrshi Mini Stadium kaba la long mynta ka sngi 22 tarik u Ïaïong.
Ïa ka Toss la jop da ka Ummulong kaba la jied ban Bat nyngkong bad ka la ioh ban kamai haduh 265 runs na ki 35 overs bad hap 8 wickets, kiba kamai runs khambun ki long u Heimonlang Lyngdoh 82 runs na ki 43 balls, u Chongtre-I-man Lamare 51 runs na ki 36 balls bad u Heisniawlangki Lamare 47 runs na ki 50 balls. Na ka liang ki nongkawang bol ka West Jaiñtia Police CC kiba ïoh ban khur Wickets bun ki long u Ram Ksoo 4 wickets na ki 7 overs bad u Khaljeng Marak 3 wickets na ki 7 overs.
Haba wan ban beh ïa ka thong ka West Jaiñtia Police CC kala lah ban kamai tang 113 runs na ki 27.4 overs bad hap lut baroh ki Wickets. Kiba kamai run bun ki long u Ishan Siangshai 37 runs na ki 67 balls, katba ki nong kawang bol ka Ummulong CC kiba la ïoh ban khur Wickets bun ki long u Wellmanson Passah 4 wickets na ki 5 overs bad u Heimonlang Lyngdoh 3 wickets na ki 4 overs.
Ïa ka nam Man of the Match la ïoh da u Heimonlang Lyngdoh jong ka Ummulong Cricket Club.