-Haduh 4 kol marwei khyrwit u Jeffree Surong ka 7-Wasa-
Ka jingialehkai phutbol jong ka Meghalaya State League (MSL) 2023, Jowai Zone kaba la pynlong ha madan Kiang Nangbah Stadium Jowai, mynta ka sngi 29.05.2023 ka jingiakhun kala long hapdeng ka Ladthadlaboh SC pyrshah ia ka Niaw-Wassa United, ha kaba Niaw-Wassa United kala jop haduh 5-0 kol ia ka Ladthalaboh SC.
Haba phai sha ka jingïakhun kala long kaba theh shilliang ha kaba ka Niaw-Wassa United ka kala ïoh ban thep haduh 5 kol ia ka Ladthalaboh SC. Ki nongialehkai ka Niaw-Wassa United kiba la ioh ban thep ia ki kol ki kynthup ia u Jeffree Surong uba la ioh ban thep haduh saw tylli ki kol tang marwei kiba u la ioh ha ka minit ba 4, ba 7, ba 45+2 bad ba 70, katba sa ia kawei pat kol jong ka Niew-Wassa United la ioh ban thep da u Owanijah ha ka minit kaba 68 jong ka jingiakhun.
Ka jingïakhun ban long lashai ka sngi Tuesday, 30.05.2023, kan long hapdeng ka Rangdajied United FC pyrshah iaka Mulait United FC ha ka por 2 baje shiteng nohphai sngi.