Ka ophis treikam ka District Mission Coordinator, SSA West Jaintia Hills ryngkat ka jingiatreilang bad ka ALIMCO naduh ka 29 tarik Naiwieng haduh ka 1 tarik Nohprah 2021 ki la pynlong ia ka Assessment Camp ha ki lai tylli ki Block jong ka District ba kynthup ia ka Thadlaskein, Laskein bad Amlarem.
Ha ki lai sngi jong kane ka Assessment Camp ha man ki Block ki longkmie longkpa da ka jingsngewkhia ia la ki jong ki khun ki kti ki la wan iashimbynta bad ialam ia ki khnang ba ki briew ka ALIMCO kin lah ban leh ia kaba donkam na ka bynta ka jingmyntoi jong ki khynnah ba donkam shisha ia ka jingiarap ba kyrpang. Ki khynnah ba donkam shisha ia ka jingiarap ba kyrpang (CWSN) kiba la wan sha kine ki Assessment Camp bapher ki don kumba 35 ngut ha Thadlaskein, 52 ngut ha Laksein bad 42 ngut ha Amlarem.
Ki briew na ka ophis treikam jong ka SSA Meghalaya kiba la ia donbynta ha kane ka Assessment Camp ki kynthup ia ka M. Kharbyngar, State Coordinator IE SSA-SEMAM Shillong, u L.K.Singh, District Coordinator, IE SSA West Jaintia Hills bad kiwei ki Volunteer katba na ki Medical Team ka Artificial Limbs Manufacturing Corporation of India (ALIMCO), Guwahati pat lawan ban mihkhmat da u Aditya Kumar Naik, Audiologist bad u Subodh Kumar Orthotics and Prosthetics.
U L.K.Singh, District Coordinator, IE SSA, West Jaintia Hills haba iakren u la iathuh ba ka thong jong kane ka Assessment Camp ka long ban ït bad wad ia ki khynnah ba don jingduna khnang ba na ka liang ka Artificial ALIMCO, Guwahati kan lah ban ai jingiarap ia ki da ki tiar ha ki por ki ban sa wan ki ban kham pynsuk ia ki la ha ka iaid ka ieng, ka bor iohsngew bad bor iohi ba kynthup ia ka Wheel chair, CP chair, Crutches, Smart cane & Braille kits for the blind, Multi Sensory Inclusive Educational Kits for Intellectual Disability, Hearing Aids.
