Ka ophis treikam ka District Mission Coordinator, SSA West Jaiñtia Hills ryngkat ka jingïatreilang ka RMSA West Jaiñtia Hills bad ka ALIMCO naduh ka 24 tarik Naiwieng haduh ka 26 tarik ki la pynlong ïa ka Assessment Camp ha ki lai tylli ki Block jong ka District ba kynthup ïa ka Thadlaskeiñ, Laskeiñ bad Amlarem.
Ha ki lai sngi jong kane ka Assessment Camp ha man ki Block ki longkmie longkpa da ka jingsngewkhia ïa la ki jong ki khun ki kti ki la wan ïashim bynta bad ïalam ïa ki khnang ba ki briew ka ALIMCO, RMC-Guwahati kin lah ban leh ïa kaba donkam na ka bynta ka jingmyntoi jong ki khynnah ba donkam shisha ïa ka jingïarap ba kyrpang (CWSN).
Ki briew na ka ophis treikam jong ka SSA Meghalaya kiba la ïadon bynta ha kane ka Assessment Camp ki kynthup ïa ka M. Kharbyngar, State Coordinator IE SSA-SEMAM Shillong, u L.K. Singh, District Coordinator, IE SSA West Jaiñtia Hills bad kiwei ki Volunteer katba na ki Medical Team ka ALIMCO, RMC-Guwahati, la wan ban mihkhmat da u Ashok Pratap Singh, Audiologist, u Sonu Kumar, Orthotist and Prosthetist bad u Hritik Jaysonwal, Data Monitor.
U L.K.Singh, District Coordinator, IE SSA, West Jaintia Hills u la ïathuh ba ka thong jong kane ka Assessment Camp ka long ban ït bad wad ïa ki khynnah ba don jingduna khnang ba na ka liang ka ALIMCO, RMC-Guwahati kan lah ban ai jingïarap ïa ki da ki tiar ha ki por ki ban sa wan ki ban kham pynsuk ïa ki la ha ka ïaid ka ïeng, ka bor ïoh sngew bad bor ïohi ba kynthup ïa ka Wheel chair, CP chair, Crutches, Smart cane & Braille kits for the blind, Multi-Sensory Inclusive Educational Kits for Intellectual Disability, Hearing Aids bad kiwei de.
