Ka Duk i Suk Committee jong ka Loompyrdi Iongpiah Dorbar Chnong mynta ka sngi (22/11/2025) ryngkat ka jingiatreilang bad ka Jowai Civil Hospital Blood Bank ka la pynlong ia ka Awareness Cum Blood Donation Camp.
Ka thong bad ka jingthmu ba ha khmat eh jong ka Duk I Suk Committee haba pynlong ia kane ka prokram ka long halor ka nongrim jong ka jingkyrshan bad ka iarap kylliang hapdeng parabriew khlem kano kano ka jingiasngew pher jait bynriew.
Shwa ban pynlong ia ka jingsynniang snam, ka la don ka jingai jinghikai pynsngewthuh da ki nongtrei jong ka Jowai Civil Hospital Blood Bank sha ki nongshong shnong ha ka jingiadei bad ka jingdonkam ban synniang ia ka snam.
Ka Dr. Ibansara Khyriem, Medical Officer, Jowai Civil Hospital Blood Bank, Panaliar ka la kren halor kane ka phang bad pynsngewthuh ruh ia ki briew ba ka long kaba ai jingmyntoi ia kito kiba ai ne synniang ia ka snam jong ki, namar kin ioh ia ka jingkoit jingkhiah bad kum ka jingpynthymmai iala ka jong ka snam jong ki.
Ka Dr. Ibansara ka la pynpaw ruh ia ka jingsngewnguh ia ka Dorbar Chnong Loompyrdi Iongpiah kaba la shim khia ia kane ka kam kaba long shi bynta ban iarap ai jingim ia kiwei pat ki mynsiem ba kordor kiba donkam ia ka snam ha ka por jong ka jingshitom ha ki jaka sumar.
