Ka District Legal Services Authority (DLSA) ka West Jaiñtia Hills District kala pynlong iaka “Special Awareness Programme” halor ka “Environmental Protection” kaba la buh kyrpang ia ka mat halor ka “Solid Waste Management” kaba la pynlong ha conference hall jong ka District and Sessions Court, Khliehtyrshi.
U kongsan ha kane ka sngi dei u Justice HS Thangkhiew u nongbishar ka High Court jong ka Meghalaya bad u Executive Chairman ka MSLSA, u Justice W. Diengdoh ka High Court ka Meghalaya bad u Chairman ka HCLSC kum u symbud kongsan.
La donlang ruh u B.K Tigga, u Chief General Manager (NEEPCO), u E. Kharumnuid, u Registrar General, High Court jong ka jylla Meghalaya kumjuh ruh u B.S Sohliya Deputy Commissioner ka West Jaiñtia Hills District, ki Judicial Officers, ki Pulit, ki Senior Advocate, ki Colleges Principal, ki President, ki Headmen, ki Nongialam Niam bapher bapher, ki Environmental Social Activist NGOs, ki dkhot jong ka Bar Association, ki Legal Aid Counsel, ki Paralegal Volunteers bad kiwei.
Ha kane ka prokram la sam ia ki Cheque sha ki 144 ngut ki nongioh jingmyntoi na ka bynta ki jaka ba la pynbeit bad ki mukotduma ban shim jaka da u kongsan bad kiwei kiwei ki nongshah jied. Ka jingsiew bai lutksan ba la pynbeit da ka NEEPCO, Shillong, ha kaba iadei bad baroh 144 tylli ki mukotduma shim jaka ka long Rs. 1,03,08,108.50 (Shi klur lai lak phra hajar shispah phraphew paise) tyngka.
Kane ka jingpynbeit ka long halor ka hukum kaba la pynmih da ka 02-06-2023, kaba la mynjur da u NA Khan, Special Judicial Of cer (Land Acquisition), West Jaiñtia Hills District, Jowai ha L.A. No. 26/2015. Ia ki 144 tylli ki mukotduma la pynbeit da ka jingsiew bai lutksan kaba la pynkiew (enhanced compensation amount), kaba kham heh da 50% ia ka pisa kaba la siew mynshwa da ka NEEPCO, Shillong.
Haba ai jingkren ha katei ka jingialang kum u kongsan, u Justice H. S. Thangkhiew u la pynpaw ia ka jingkmen ban ia don lang bad u la ban jur ia ka jingdonkam jong kum kine ki prokram. U la pynpaw ba ka prokram ka kren shaphang ar tylli ki bynta bapher bapher: ka jingpyniaid ia ka mariang bad ka jingkhang ia ka jingmudui pynshitom kaba la slem bha kaba iadei bad ka jingshim jaka. U la kdew ba ka khyndew ka dei ka marpoh khyndew kaba don jingkut bad kaba kordor bha ia ki paidbah, da ka jingkiew dor bad ka jingpynbor kaba nang jur ia ka jingdon jaka. Ka aiñ kaba rim kam shym la pynbeit bha ia kine ki mat, hynrei ka aiñ kaba thymmai ka pynbeit. U la ban jur ia ka jingdonkam ban pynbeit ha ka por kaba biang ban lait na ka jinghiar dor jong ka bai lutksan katba nang mih ki sngi.
