Shi bynta na ka prokram ‘Nasha Mukt Bharat Abhiyan’ na ka liang ka ophis District Social Welfare Officer, Jowai ha kane ka sngi saitjaiñ kala pynlong da ka jingñiah ar shaka ne ka Bike Rally kum ka dak ban pynsngewthuh paidbah halor ka jingsniew kaba mih na u drok.
La kaweh lama ïa kane ka rally da u Additional SP u Ishan Gupta IPS, kaba la sdang na District Library Mynthong, Jowai da kaba ïaid lyngba ki dong bapher bapher ka sorkar Jowai bad leit pynkut ha Wahiarong, Mihmyntdu.
U Ishan Gupta haba ai jingkren ula ban jur halor ki jingma kiba lah ban mih na u drok bad kaba ktah ïa ka jingim bad kumjuh ïaka imlang sahlang baroh kawei. Kumta ula kyntu ïa ki nongshong shnong khamtam ïa ki khun samla ba kin long ki nuksa jong ka jingkylla, da kaba pynsngew wat na ka liang ka sorkar ka ïaleh katba lah ban ïakhun pyrshah ïa ka jingpyndonkam ïa u drug.
Shuh shuh ula ong ka jylla ka Meghalaya, khamtam ka Jaiñtia Hills ka long kaba la riewspah bha ha ka liang ka jingdon jong ki mar poh khyndew bad ka riti ka dustur, kumta u buh ka jingkyntu ban pyndonkam hok ïa ki ha ka jingim kaba manla ka sngi, da kaba kiar sharud ïa u drug.
Ula khot ïa baroh ki nongshong shnong ba kin long kiba trei shitom ban wanrah ïa ka jingshong suk shong shngaiñ bad ka bha ka miat na ka bynta ka lawei.
Ha kane ka sngi la ïoh shibun ki jingbatai bniah na ki riew shemphang kynthup naduh u F.G.N Ryngnga uba dei u District Mission Coordinator, District Hub for Empowerment, bah D. Nongtdu O.C Jowai Police Station bah J.K. Majaw, u C. Langstang, Ambassador, Nashamukt Bharat Abhiyan Campaign kiba batai shibun ki lad jingtip ban ïada na utei u jait jingdih.
Ha ka jingïalang la pynïaid daka kong Y. kyndait ka Gender Specialist ka District Hub for Empowerment of Women, katba ïa ki kyntien ai khublei la ïoh na ka kong Y. Najiar, DSWO, Jowai.
