Ki Nongtrei Bank ba don ha ka shatri bapher bapher jong ka United Forum of Bank Union ha ka 27 tarik Kyllalyngkot 2026 ki la pynlong ia ka jingiakhih ha phyllaw jong State Bank of India Shillong Branch na ka bynta ban dawa ban ai shuti noh ha ka sngi Saitjain bad ban long trei 5 sngi ha ka shitaiew.
Ha kane ka sngi ki nongtrei na ki Bank Bapher bapher ba don ha ka jylla ki la iashim bynta lang ha kane ka sngi pynlong ia ka jingiakhih ba shisngi.
Haba kren sha ki lad pathai khubor u Convener jong ka United Forum of Bank Union Meghalaya Unit u Bah Wanraplang Mawroh u la ong ka jingiakhih ka kynhun ka long ban dawa beit ban long trei 5 sngi ha ka shitaiew bad ka sngi saitjain ki dei ban ai shuti ym dei tang ha ka taiew ba ar jong ka sngi saitjain bad taiew ba 4 jong ka sngi Saitjain.
U la ong kane ka jingiakhih kam dei pyrshah ia ki paidbah hynrei ka dei na ka bynta ka koit ka khiah jong ki nongtrei Bank baroh.
Nalor kata u la ong ki don kiwei ki mat kum ka jingduna ki nongtrei kat dang mih ki snem hynrei ka jingiakhih mynta ka sngi ka dei beit halor ka jingdawa ban trei 5sngi.
Na ka liang u Secretary u Bah Davis Lyngdoh u la ong ka kynhun ka la mynjur bad tyrwa ban trei noh 40 minutes ha kiwei ki sngi hadien ba ka kynhun ka la dawa ban ai shuti noh ha ka sngi saitjain.
Khatduh u la ong lada 40 minutes ki trei ha kiwei ki sngi haduh sngi thohdieng ka la iaryngkat bad ka jingai shuti ha ka sngi saitjain.
