Ka All Jaiñtia Muster Roll Workers & Labour Union, Thadlaskeiñ C&RD Block Unit, mynta ka sngi Thohdieng kila pynlong ïa ka jingïakynduhlang ha ka ‘5th Annual General Meeting’ kaba la long ha Dorbar Hall Wahïajer, West Jaiñtia Hills District.
Ïa ka jingïalang ha kane ka sngi la pynïaid da u Dathrangki Lakiang, President Thadlaskeiñ, ha ka jingdonlang u kongsan jong kane ka sngi u bah R.W. Wahlang Joint Labour Commissioner jong ka tnad Labour ka sorkar jylla, u ma K.L. Pariat Adviser Central Body CEC, ki nongïalam ka AJMW&LU bad ki nongtrei Muster Roll na katei ka Block.
U ma Khroo. L Pariat ha ka jingkren ula kyntu ïa baroh ki nongtrei bylla sngi ba kin long kiba trei shitom ïa ka kam ba la bynshet ha ki katkum ka por ba la buh bad kim dei satia ban hun tang ban ïoh ïa ka bainong khlem ka jingtrei hok ïaka kam.
Ula pynsngew ruh wat na ka liang ka sorkar kan ai jingïarap ïa baroh ki khynnah skul ba kin ïoh ïa ka jingnang jingstad hapoh ka rta kaba 6-14 snem, kumta kum ki kmie ki kpa kiba trei bylla sngi ki dei ban pynshlur ban phah skul ïala ki jong ki khun hapoh kitei ki rta khlem donkam satia ban siew ïaka bai skul.
Shuh shuh ula pynsngew ïa ki kyntien da kaba ong “wat ailad ïa ka pisa ba kan ïoh synshar ha ka jingim, hynrei dei ban long ki kynrad ha ka pisa”. Ula kyntu ïa ki nongtrei bylla sngi halor ka jingdonkam ban don ïa ka card rashon.
Katba na ka liang u kongsan bah Wahlang haba ai jingkren ula ai ka jingïaroh halor ka rukom treikam jong ka All Jaiñtia Muster Roll Workers & Labour Union CEC hapoh ka jinglam khmat u ma K.L. Pariat da kaba ong ruh ba kane ka seng ka trei ha ka nongrim kaba shisha na ka bynta ki para nongtrei bylla sngi hapoh ka jylla.
Ula ong kum ki nongtrei Muster Roll hapoh ki tnad sorkar bapher bapher ki long kum ki nongtrei bylla sngi (Labour), kumta ki dei ban pyndep hok ïa ka kamram katkum ka por bala buh bad kim dei ruh ban ai pateng ha kiwei ban leit trei ïa ka kam jong ki.
“Ka jingïoh jong phi ïa ki jingmyntoi kiba bun na ka sorkar dei lyngba ka jingtrei shitom jong ki nongïalam ka All Jaiñtia Muster Roll Workers & Labour Union, ha kaba u bah Wahlang kyntu lada don kino kino ki jingeh kum ki nongtrei bylla sngi ki ia kynduh kidei ban pyntip mardor khnang ba ka sorkar kan ïoh leh ïa kaba donkam”.
Ha ka juh ka por ula kyntu kum ki kmie ki kpa jong ki nongtrei bylla sngi ki dei ban phah leit shah hikai ïa ki khun ba la pep skul ha ki ‘Skill Development’, khnang ba kin lah ban ïeng hala ki jong ki kjat ban seng ïa ki kam la jong. Ula ai jingkyntu ruh haba trei ïa kano kano ka kam dei ban trei shitom khnang ban ïoh ka jingshañiah na ki nongaikam, ong u bah Wallang.
La pynphuh shuh shuh ïa kane ka sngi da ki jingshad tynrai, ki jingrwai bad ka jingïaid Fancy Dress kiba la shim bynta da ki nongtrei Muster Roll Thadlaskeiñ C&RD Block Unit, ha ka juh ka por u kongsan jong kane ka sngi ula ot ruh ïa u cake jong ka jingrakhe ïa ka ‘5th Annual General Meeting’.
