Ka khubor bala phah Meghalaya Legislative Assembly, la ïathuh ba ka Committee on Empowerment of Women jong ka ïing dorbar thawaiñ jong ka jylla Meghalaya ka la lum ia ka jingialang ha kane ka 2 tarik mynta u bnai ha West Garo Hills ha ophis treikam u Deputy Commissioner Tura.
Ha kane ka jingialang la don lang ki Deputy Commissioner jong ka West Garo Hills bad South West Garo Hills, u Superintendent of Police jong ka South West Garo Hills, bad kiwei kiwei ki nongkitkam. Ka jingthmu kaba kongsan jong kane ka jingialang ka long halor ki mat bapher bapher, khamtam eh ia ki kam runar pyrshah ia ki kynthei bad ki khynnah.
Ïa kane ka jingïalang la pynïaid da ka Chairperson jong ka Committee ka kong Santa Mary Shylla, ha kaba la ïadon lang ki Dkhot ka Committee ba kynthup ia u Marthon J Sangma, MLA, u Bah Matthew B Kurbah, MLA, u Shri Gabriel Wahlang, MLA, u Shri Damanbiat Lamare MLA.
Ha katei ka jingwan jngoh, ka Committee ka la ïakynduh ruh ïa ka briew kaba la ngat ha kawei ka jingjia dang shen ha kaba katei ka longkmie ka la shah shoh paidbah ha ka Shnong Lower Teksragre, Damal A.sim. Kane ka longkmie ka don mynta ha ka jaka sumar ha One Stop Centre kaba don ha Tura, West Garo Hills.
Ka Chairperson ka kong Santa Mary Shylla ka la pynpaw ba kane ka jingïalang ka la kren ïa ki katto katne ki mat ba kongsan kiba ïadei bad ki ar tylli ki District, da kaba pynleit jingmut kyrpang ïa ki kam runar pyrshah ïa ki kynthei khynnah. Ka la pynpaw ba ka Committee ka thmu ban ïakren ïa kine ki mat bad ka Sorkar, da kaba kdew ïa ka jingdonkam ïa ki lad jingïarap kum ki jaka ri khunswet bad ki jingpynkoit ha ka liang ka jingmut jingpyrkhat.
Ha kaba ïadei bad ka jingïakynduh jong ka bad katei ka longkmie na ka shnong Lower Teksragre, ka Chairperson ka la kdew ba ka jinglong jingman jong katei ka longkmie ka la kham bha bad kham ïoh bor.
