Ka Executive Committee jong ka Khasi Hills Autonomous District Council hapoh ka jingialam jong u CEM ka KHADC, ha ka 26 tarik Nailar 2025 ki la wan sha Majai ban shong jingialang bad ki Synjuk Sengbhalang na Sohra ba kynthup ia ka HNYF, HANM, HYC, FKJGP, CRYF bad UHM haba iadei bad ki mat kiba dei ha ka Thaiñ Majai.
Ha kane ka sngi kiba la wan sha kane ka jingialang ki kynthup naduh ka Hima Sohra, Sordar jong ka Majai, Mawlong, bad ki Synjuk Sengbhalang na ki 6 tylli ki Seng jong ka Thaiñ Sohra.
Haba kren ha kane ka sngi na ka liang u CEM ka KHADC u bah Shemborlang Rynjah u la ong ka jingialang ha Majai ka dei hadien ba ki Synjuk na ki 6 tylli ki Seng ki la wan ban pynsngew sha u ha kaba iadei bad ki mat kiba hap ha ka thaiñ Majai.
Shuh shuh u la ong ka jingwan sha Majai kam dei ba ka District Council ka wan ban khynra bar jylla hynrei ka dei beit ka jingialang ban iatai haba iadei ka jingpynsngew na ki Synjuk Sengbhalang na Sohra bad ki Khlieh Nongsynshar Shnong ba kynthup ia ka Hima Sohra.
Nalor kata u la pyntip ka jingialang ba mynta ka dei beit halor ka khaïi ka pateng, trade license, iew beaiñ, ka jingwan rung kythep jong ki mynder bad kumjuh haba iadei bad ki kyrteng shnong kiba don ha ka thaiñ Majai, Mawlong kiba don ha ka kyrteng nongwei.
U la iathuh ba na ka liang ka District Council kan sa shong biang ia ka jingialang bad ka la bthah ia ki bor Synshar shnong ban bud ryntih haba iadei bad ka jingialang kaba la long mynta ka sngi.
Hadien ba la wai ka jingialang ka la don ruh ka jingwan jngoh u CEM ia ka ïew Majai ha ryngkat ki EM ka KHADC, ki enforcement bad ki Pulit bad ha ka por ba wan jngoh u CEM baroh ki dukan ha kine ki thaiñ Majai ki la khang lut.
