Ka Society for Urban and Rural Empowerment (SURE) kala pynlong ka jingpynshai paidbah ha ka shnong Namdong B shaphang ki projek kiba kane ka seng ka treikam mynta. Ha ka jingïalang kaba la pynïaid da u Waheh Chnong jong ka shnong Namdong B u ma DS War, ula pdiang sngewbha ïa ki nongtrei jong ka SURE kiba la wan ban ai jingtip bad jingshai ïa ki nongshong shnong ha kaba ïa dei bad ki mat kiba donkam bha ha ka imlang sahlang. Ula ong ruh ba ka jingïashongkha khynnah ne ka jingïashongkha khlem pat dei por ka dei kawei na ki jingeh kiba ka shnong ka ïa kynduh ha kine ki por. Shuh shu ula ong ba ka jingpynkhlañ ka rep ka riang ka dei kawei na ki thong jong ka shnong hi baroh kawei.
Na ka liang jong ka SURE la ïoh nyngkong ia ka jingbatai shaphang ka projek kaba ai kyrteng Empowering Indigenous Communities through Agroecology Learning Circles (ALC) for resilient, integrated and innovative natural resources management kaba ka seng ka ïatreilang bad ka North East Slow Food and Agrobiodiversity Society kaba la kren da ka kong Daka Bareh (NESFAS). Ïa kane ka projek kaba la bei pisa da ka World Bank lyngba ka Meghalaya Basin Management Agency (MBMA) la pyntrei daka SURE ha ki katto katne tylli ki shnong ha West bad East Jaiñtia Hills Distrik. Ka jingthmu jong kane ka projek ka long ban pynkupbor ïa ki paid riewlum kiba long ki trai ri trai muluk lyngba ka rynsan jong ka ALC. Ka jingthmu ka long ruh ban ïoh ia ka meiramew kaba biang kaba dap, kaba kynthup lang ïa baroh bad kaba ïarap ruh ban wad ïa ki lad thymmai khnang ba ka lawei jong ka ïohbam ïohdih kan long kaba shngañ (Food Security).
Hadien jong kane la ïoh ruh ka jingkren halor ka phang ka jingïohlok khynnah kaba la ktah ïa kiba bun ki shnong ha ka imlang sahlang ïa kaba la kren da ka Niwanka Shylla kaba trei kum ka Zonal Supervisor jong ka projek Link Worker Scheme kaba la kyrshan da ka Meghalaya AIDS Control Society. Ka jingshongkha khlem pat dei por ym tang ba ka long be-añ hynrei ka ktah ruh ïa ka jingim jong ki samla bad kumjuh ruh ïa ka imlang sahlang. Shuh shuh ka kong Niwanka kala kdew ruh ba ki don kiba tehlakam ïa ka shongkha khynnah kiba lah ban buh ïa ki haka jingeh.
Ka kong Rosa Ksoo kaba long ka Village Organisation President hapoh ka shnong kala ïaroh ia ka SURE na ka bynta kane ka jingai jingshai ha kaba ïa dei bad ka jingshong kha khynnah. I ong ba kane ka dei ka jingeh kaba khraw tam hapoh ka shnong ka thaw.
Ka bynta kaba lai pat ka dei ka jingkren halor ka jingpang AIDS kaba la sdang jyllei mynta wat sha ki thañ nongkyndong ruh ia kaba la kren da ka kong Darimika Lywait.