Ki borpyniaid ka Seng ki khynnahskul jong ka Ri India ba la tip kum ka Akhil Bharatiya Vidyarthi Parishad (ABVP) kum shi bynta ban wanrah ia ka jingiajuh iajan hapdeng ki dkhot ka seng ba don hapoh ka Jylla naduh ka 13 tarik haduh ka 15 tarik Kyllalyngkot 2023 ki la pynlong ia ka 6th State Conference ha Yungwalieh ka Dorbar Chnong Chilliangraij, Jowai.
Ha ka jingialang jong kane ka 6th State Conference ba long ha ka 14 tarik la wan ban donlang da ka Padmashree Award kong Trinity Saioo kum ka kongsan, u Hamarsing L. Kharhmar kum u symbud kongsan, u Ashish Chauhan, National Organising Secretary, ABVP, u Dr. Sashankutalang Khongthohrem, State President, u Tengku M.Marak, State Secretary ABVP, u S.K.Lato, Chairman Reception Committee, u Skemjingmut Law, Secretary Reception Committee bad kiwei ki riewrangbah.
Ia ka jingialang jong kane ka sngi la pyniaid da ka Sumarlin Mawlong, State Social Media Convenor ha kaba u ma S.K. Lato, Chairman Reception Committee u la ai ki kyntien pdiangburom bad laioh ruh ka jingkren na u Dr. Sashankutlang Khongthohrem, State President ABVP bad u Skemjingmut Law, Secretary Reception Committee.
Ka Padmashree Award Kong Trinity Saiookum ka kongsan ka la ai ki kyntien sneng kyntien kraw bad ai mynsiem ia ki dkhot ka ABVP katba u Hamarsing L.Kharhmar haba kren u ai mynsiem bad pynkynmaw ia ki dkhot ka ABVP halor ki laitylli ki kyntien maitphang ka seng kiba ong “Knowledge-Character-Unity”.
Shuhshuh ha kane ka jingialang u Ashish Chauhan, National Organising Secretary ABVP u la kren bad iathuh shaphang ki nongrim treikam ka seng Akhil Bharatiya Vidyarthi Parishad (ABVP).
Ha ki lai sngi jong kane ka 6th State Conference la pynlong ki prokram bapher ba kynthup ia ka Proseshon kum ban ai jingshai shaphang ka seng ABVP bad ruh la don ki Cultural Prokram bad kiwei kiba lah ban khring ia ka pyrkhat pyrdain ki dkhot ka ABVP kiba la wan na ki District bapher jong ka Jylla.
