Ka Bethany Society Phramer, West Jaiñtia Hills Unit kala pynlong da ka prokram ba la tip kum ka ‘We Ring the Bell Campaign’ ha Ladthadlaboh Dorbar Hall hynnin ka sngi, kane ka prokram ka long shi bynta ban ai mynsiem lem ïa kito ki khynnah kiba don ka jingduna ha ka bor met khnang ba kin ïoh bynta lem khamtam ha ka liang jong ka jingnang jingstad.
Ha kane ka sngi ki longkmie longkpa bad ki khynnah skul kila wan ban ïashim bynta lang ha kane ka prokram jong Bethany Society Phramer kiba la ïoh jingbatia bniah shaphang ka thong jong kane ka prokram.
U L.K. Singh, Coordinator CWSN, SSA West Jaiñtia Hills ula kren shaphang ka ‘Inclusive Education-Inclusive School’ bad ki lad jingïarap kiba lah ban ai kyrpang na ka bynta ki khynnah kiba don jingduna ha ki dkhot met, da kaba ong ba ka Samagra Shiksha Abhiyan kala ju ai jingïarap sha kitei ki khynnah.
Katba na ka liang ka Mansuk Rymbai, Office Assistant Social Welfare Department, WJH kala pynsngew shaphang ki lad jingïarap kiba lah ban ïoh lyngba ka tnad Social Welfare Department. Ha kane ka prokram ‘We Ring the Bell Campaign’ la pynlong ruh ka jingshoh pynsawa ïa ki pliang bad kiwei de ki tiar, ka Signature Campaign bad ka jingïaid Rally shi bynta ban ai jingtip shaphang ki lad jingïarap kiba kitei ki khynnah ba don jingduna haka bor met ki lah ban ïoh lyngba ka sorkar kmie.
