Ka District Commerce & Industrial Centre (DCIC), West Jaintia Hills, ka la pynlong da ka workshop kaba kyrpang halor ka Uttar Poorva Transformative Industrialisation (UNNATI) Scheme, 2024, mynta ka sngi 4.09.2025, ha Conference Hall jong ka ophis DCIC, ban ai jingtip bad pynsngewthuh sha ki samla (entrepreneurs), halor ki lad kaba don hapoh kane ka skhim ban kyntiew ia ka roi ka par ha ka liang kamai kajih.
Kane ka workshop ka la pyniasnoh lang ia ki tnat sorkar, ki tnat trei kam bapher, ki rangbah shnong bad kiwei na ka bynta ban wad ki lad ki lynti ha kaba iadei bad ka roi ka par.
Ha ka jingkren u bah B. Warjri, General Manager (DCIC) Jowai, u la ong ba kane ka workshop kam dei tang ka jingpynlong programme hynrei ka dei ka lad ban nang, ban ia kyrshan lang. U la kdew ba ka West Jaintia Hills, ka dei kaba riewspah ha ka kolshor, ka riti synshar bad kaba don ia ki mar pohkhyndew (natural resources) ka don ka lad ban kyntiew kyrpang ia ki samla.
U bah Warjri u ngeit skhem ba kane ka workshop kan long kum ka jaka ne ka platform ban ia phylliew jingmut lang bad ban kyntiew ia ka jingiatreilang hapdeng ki shnong, ki tnat sorkar bad ki kynhun trei kam bapher.
Ha ka jingkren u bah Badonlang Warjri, PIU na ka DPIIT (Department for Promotion of Industry and Internal Trade), u la batai bniah ia ka thong jong ka skhim UNNATI. U la ong ba kane ka skhim kan wanrah ban kyntiew ia ka roi ka par ha ka thaiñ Shatei Lammihngi, ban thaw lad kam lad jam na bynta ki samla, ban kyntiew ha ka sap trei kam (skill development).
U la ai nuksa halor ka PepsiCo bottling plant ha North Garo Hills ban pyni ba ki kam industrial kum kine ki wanrah ka iajan ha ka kam kamai kajih ban thaw ki lad ban kamai bad ai jinghikai.
U la pynpaw ruh ba ka mang tyngka jong ka skhim UNNATI ka long kumba Rs. 10,037 klur, kaba la pynbeit na ka bynta ban pyndonkam ha ki awareness campaign, sensitisation programme bad ka media outreach. Ka bynta kaba heh ka long ban ai jingkyrshan sha ki karkhana kiba la register hapoh kane ka skhim ha kaba la ai da ka two instalment – kaba nyngkong ka 60% bad kaba sah kan ai da ka FIFO (First In First Out) system.
U ma Kmen Lato, uwei na ki Industrialist uba la sdang naduh u snem 1986 na Jaintia Hills, u la iathuh halor ka jingiaid lynti jong u ha ka ban pynmih ia ki karkhana ha ka thaiñ. U la kyntu ia ki samla ba ym dei ban sheptieng ia ka mang tyngka namar kaba kongsan eh ka long ka jingiatreilang, ka jingshisha bad ka jingtrei shitom.
U la kdew ruh ia ka lad jong ka Act East Policy, ha kaba la lah ban pyniaid ia ka commerce lyngba ka Dawki Land Port sha ki ri South East Asia bad shabar ruh.
U la kyntu jur ia ki nongialam shitengbynta ba kin ym sheptieng hynrei kin shim ia ka lynti kaba khlaiñ bad leit shaphrang ban plie ia ki lad kum ha ka tourism bad karkhana kiba lah ban wanrah ia ka roi, ka shaniah ha lade bad ka burom ha ka District bad ka Jylla baroh kawei.
Ha ka technical session, u bah Badonlang Warjri, u la ai ia ka presentation halor ka UNNATI Scheme. Ka kong S.K. Challam, Inspector of Taxes, Taxation Department, Meghalaya ka la kren halor ka GST Compliance, u B. Kharkongor, BDR na NEDFi bad u S.P. Gangte, AGM na Small Industries Development Bank of India (SIDBI) ki la ai jingkren halor ka Financial Assistance sha ki MSME. Katba ka kong E. Shylla na MSPCB ka la ai ka presentation halor ki kam jong ka MSPCB.
Ia ka program la pyniaid da u samla Vino Syngkon, bad la ai ka jingai khublei da u S. Pale, Industrial Promotion Officer, DIC Jowai.
