Ka Deen Dayal Upadhyay Community College (DDUCC) Skill Development, Wahiajer jong ka Skul bah North-Eastern Hill University (NEHU) ka la lah ban pynlong ia ka prokram ai jinghikai kaba 6 sngi ha kaba ia dei bad ka “Handmade Embroidery Making” na ka bynta ki samla ka shnong ka thaw naduh ka 29 tarik Kyllalyngkot 2025 haduh ka 4 tarik u February 2025.
Ka jingthmu jong kane ka prokram ka long ban pynkup bor ia ki samla trai shnong ha ka imlang sahlang.
Ha kine ki hynriew sngi, la ai jinghikai ïa ki nongtrei kti na ki kynhun bapher bapher jong lyngba ki jingpyni ba lah ban leh bad ki jingïakren ba la hikai da ki Nongïarap.
Ki nongtrei kti ki la ioh ia ki jingshemphang bad jingtip kiba kordor na ki bynta bapher bapher jong ka jinghikai, kynthup ia ka jingot, ka jingpynbeit bad ka jingpyndonkam ia ki jait jingpynbeit bapher bapher ha ka jingshna jaiñ kti ban kyntiew ia ka jingtbit jong ki ha ka kam shna jaiñ shibun.
Ïa kane ka jinghikai la pynkut hynne ka sngi ka 4 tarik u Rymphang 2025 ka jingdonlang u Prof. H. Lamin (Retd), Founder Principal I/c, DDUCC, NEHU kum u Kongsan bad u Lukas Jat, Dkhot ka Shnong Wahiajer.
Ha ki jingkren jong ki, ki la pynpaw ïa ka jingdonkam jong ka jingthaiñ jaiñ kti kum ka bynta ba kongsan jong ka kolshor ba riewspah jong ka ri kaba pynshlur ruh ïa ki samla ban ïai trei shitom khnang ban ïoh ïa ki thong jong ki na ka bynta ka lawei kaba phyrnai.
Kiba la ai jingkren ki kynthup ruh ïa u Prof. S. M. Sungoh, Principal I/c, DDUCC bad u Dr. F. R. Sumer, Librarian, NEHU.
Kane ka jingthmu ka long shi bynta jong ka jingshimkhia ba kham jylliew jong ka DDUCC/NEHU ha kaba kyntiew ïa ka jinghikai kam bad ka jingpynroi ïa ki sap, kum shi bynta jong ka NEP 2020 bad kaba ïahap bad ka jingthmu jong u (L) Pandit Deen Dayal Upadhyay. Dei lyngba kine ki prokram ai jinghikai bapher bapher kiba la pynlong man ka por ba ka College ka la ioh ia ka jingkynthoh kaba bha na ki paidbah ha ka thaiñ ban iarap ia ki riew shimet jong ka imlang sahlang kiba donkam jingiarap ban kamai jakpoh wat hapdeng ki jingeh kiba ki iakynduh kaba ai lad ruh ia ki samla bad ki nongrep ban pyndap ia ki sap jong ki kam bapher bapher na ka bynta ban pyndap pynbiang ia lade.
La pynkut ia kane ka jingialang da u Wolnish Rymbai (Programme Coordinator) ula ai khublei ia baroh ki nongiashim bynta ryngkat ka jingsam ia ki syrnod sha baroh ki nongiashim bynta ban pyndep ia kane ka prokram ai jinghikai.
