Ha ka sienjam ba kongsan ban khanglad ïa ka jingshongkha khynnah bad ban thaw ïa ka jingpynsngewthuh paidbah halor ki jingsniew jong ka, ka District Legal Services Authority (DLSA) bad ka ASHA Unit, East Jaiñtia Hills District, ki la pynlong ïa ka Legal Literacy prokram kaba la tip kum ka “Towards Child Marriage-Free Village Initiative-cum SOPSA A-R Bharat Campaign’, ha Khliehriat.
Kane ka jingïaid rally ka la sdang naduh madan ïalehkai ka Khliehriat Higher Secondary School, ter ter lyngba ka NH-6 haduh Khliehriat West Community Hall Junction, bad la wanphai biang sha ka jaka ba la sdang. Shwa ia kane ka jingialang, la pynlong ia ka prokram pynsngewthuh ia ki khynnah bad samla pule shaphang ki jingthmu jong kane ka jprograme. Ha kane ka prokram la wan ïashim bynta da ka Additional Public Prosecutor, East Jaintia Hills District, Smti. Melody War, Chief Legal Aid Defence Counsel, Smti. R. Manar, Deputy Chief Legal Aid Defence Counsel, Smti. P. Paswett, Special Educator, East Jaintia Hills District, u Salanbor Kamar, ASHA Unit members, Police bad ki khynnah skul.
Haba ai jingkren ka kong Melody ka la batai shapnag ki khynnah hapoh ka Child Marriage Act, da kaba ong ba ki khynnah kynthei kiba hapoh 18 snem bad ki khynnah shynrang kiba hapoh 21 snem la kheiñ ba ki dei kiba dang rit ka rta. Ka la pynpaw ruh ia ki kyndon jong ka aiñ POCSO, kumjuh ruh shaphang ki jingma kiba khraw kiba mih na ka jingshongkha dang rit, kynthup ia ka jingkoit jingkhiah kaba sniew, ka jingduk, ka jingshah lehbein, bad kiwei de ki jingeh.
Ka Chief Legal Aid Defence Counsel kong R. Manarka la pynpaw ba ka jingshongkha khynnah bad ka jingkha khun ha ka por dangrit ki dei ki jingpynkheiñ ïa ka hok longbriew manbriew kiba pynduh ïa ka jingnang jingstad bad ka koit ka khiah jong ki khynnah.
