Ka Dorbar Shnong Chilliangraij, Jowai kumba la ju long manla u snem ban pynim ïa ka riti ka dustur hashwa ban hiar rep sha ki hali ki pynthor, kala pynlong ïa ka jinglehkmen Bampalar bad ka jingïalehkai Drama kaba la sdang naduh ka 2 tarik bad pynkut ha ka 4 tarik u Jymmang, 2024 ha Yungwalieh jong ka shnong.
Ha shwa ban sdang ïa ka Bamphalar 2024 kala don ka jingïalang ba lyngkot ba la pynïaid da u Cheini Niangti, Symbood Waheh Shnong, la pynsngew ïa ka Nongrim jong ka Bamphalar da u Lamphrang Shylla, Secretary Art & Culture Committee, na u Oriland Shylla, General Secretary bad na u ma D.H. Pde, Waheh Shnong uba long kum u kongsan, katba ïa ki kyntien sngewnguh la ai da u Rafter Rymbai, Asst. General Secretary.
Ki artylli ki Drama ba ki paidbah kila ïoh lad ban sakhi ha ki ar miet jong ka Bamphalar ki kynthup ïa ka ‘Slabhah’ kaba la thoh da u Sylvestar Lanong bad kawei ka ‘Khyrngiat’ bala thoh da u K.C. Roy Pde, la don ruh ki jingpynbyrnia da ki jingshad bad ki jinglehkai kai bala shim bynta da ki khynnah bad ki samla jong ka shnong.
