Ka Seng Hynniewtrep Youth Development Council (HYDC) ha ka 15 tarik Rymphang 2025 ka la pynlong ia ka Panel Discussion ne ka jingiatainia na ka bynta ki Kyrtong ka Sohryngkham Konstitwensi ha Madan phutbol Mawrynkneng .
Ki Kyrtong kiba la wan iashim bynta ki long u Samla Jonathan Syiem na ka Seng Congress, Elias Kharbihkhiew na ka Seng NPP, U Bah Joseph H Pyngrope na ka Seng KHNAM bad u Dr. O S Jyrwa Kyrtong shimet lait noh u Kyrtong jong ka VPP bad u kyrtong shimet kiba khlem wan sha kane ka rynsan iatai na ka bynta ki mat jong ka KHADC.
Ha kane ka sngi ki Kyrtong na Sohrynkham Konstitwensi ki la kren haba iadei bad ki mat na ka bynta ka Elekshon MDC sha KHADC.
La sdang ban ai jingkren ha kane ka rynsan da u Kyrtong jong ka KHNAM u bah Joseph H Pyngrope da kaba sdang u la ong ka KHNAM ka ieng ban iada ia ka District Council na ka bynta ban tei ban pynbha bad ban pynbeit ia ki aiñ kiba la don lypa ha District Council bad u la ong ruh lada ka KHNAM ka poi ha ka bor kan pynbeit lut ia ki jingai trading license sha ki bar Jylla bad ki kynrum kynram ha District council hapoh 1 snem. U la ong ruh ia ki paidbah haba jied ia uno uno u nongmihkhmat dei ban jied da ka bor jingstad bad shemphang na lade khnang ba kan ym long kaba sepei.
Na ka liang u Kyrtong jong ka Congress u Samla Jonathan Syiem u la ong ka mat ba nyngkong duh ka dei ban ai ka jingshakri ia ki paidbah ban pynskhem ban pynjanai ia ka khyrnit kaba Hynriew khnang ba kan long ka jingmyntoi ia ka District Council. U la ong ruh ka Congress kam iakren ia ka article 371 namar ha ka 371 kam don kata ka legislative, Executive, Judiciary, ha ka khynrit kaba 6 ngi don ia ka legislative, executive bad ka Judiciary ki aiñ kiba khlaiñ kiba ngi la ban shna aiñ da lade ialade bad u la ong ruh lada jied ia ka Congress kan pyneh pynsah ia ka riti ka dustur, ka khyndew ka shyiap, ban iasaid na ka bynta u paidbah bad katkum ka jingkylla jong ka mairang ngin pynneh pynsah ia ka mei mairang ki wahduid ki khlaw ki btap khnang ba ka pateng ban wan kan im.
Na ka liang u Kyrtong jong ka NPP u Bah Elias Kharbihkhiew u la ong ha District council la don kumba 72 snem la synshar da ki ba bun ki Seng bad la bat bun da ka Seng Congress bad ka Seng UDP bad kumta ter ter hynrei kat ba shna kino ki bill ha District council kam long aiñ kawei ruh bad ha ka kynti ba mynta hapoh ka jingialam jong ka NPP ha ka sorkar bad kumjuh ha District Council hapoh ka jingialam jong u Bah Pyniaid Sing Syiem CEM ki shna kawei pa kawei ka bill ban pynneh pynsah ia ka khyrnit kaba Hynriew ban pynkup bor ia ki Rangbah Dong, ki Dorbar Shnong, ki Dorbar Kur bad ban pynkylla ia ka land bill sha ka land act bad ban pynskhem shuh shuh ia ka hok longtrai mantrai ia ka khyndew ka shyiap jong ngi bad u la ong ruh ki bill ban pynneh pynsah baroh la shna da ka Seng NPP hapoh ka Jingsynshar jong ka NPP ha District council bad u la ong lada ym vote ia ka NPP ruh kan poi beit sha ka NPP.
Na ka liang u Dr. OS Jyrwa u la ong baroh kiba ieid ia ka ri bad ka Jaitbynriew u la kyntu ia ki paidbah ba kin da pynshong nongrim shwa ba kin vote iano iano ruh bad dei ban jied ia ki nongmihkhmat kiba ieid shisha ia ka ri bad ka Jaitbynriew ym ban myntoi shimet ki ban kit ban bah ia ka eh ka shon jong ka Jaitbynriew bad ka konstitwensi baroh kawei dei ban pyrkhat na ka bynta ka bha ka miat jong ka imlang ka sahlang. Ka District Council ka dei ban ri kyndong ia ka jinglong trai ia ka khyndew ka shyiap ia ka akor ka burom kum ka Jaitbynriew ia ka rukom synshar rukom leh niam bad ka khyrnit kaba Hynriew ka wan na ka bynta ki rit paid ban iada.
Shwa ban pynkut ia kane ka jingialang rynsan iathir na ki Kyrtong na ka bynta ban ïakhun ia ka Elekshon MDC sha KHADC.
Na ka liang u President Rangbah jong ka Seng HYDC u la ai jingkren da kaba ong ka jingpynlong ia kane ka rynsan iatai ka long ruh kum shi bynta ban peit bad khmih ia ka jingstad jong ki Kyrtong ki ban mihkhmat sha ka KHADC khnang ba ki paidbah kin ioh ban jied ia uno u Kyrtong uba stad.