Ka Krishi Vigyan Kendra (KVK) Jaiñtia Hills, mynta ka sngi 13 tarik u Lber ka la pynlong da ka Live Webcast na ka bynta ban ai jingtip sha ki nongrep shaphang ka ‘22nd Installment jong ka PM Kisan Samman Nidhi Scheme, haka jingïalang bala long ha ophis KVK, Jaiñtia Hills, Moopun, Wahiajer.
Ïa kane ka prokram la pynïaid da u M. Kharbuli (Farm Manager) bad bud sa ka jingai burom ïa i kongsan, kumjuh ïa ki ophisar na ka District Agriculture bad Horticulture bad ki Assistant Professor na ka CPGSAS (CAU I), Umiam bad la ïoh ruh ka jingkren pdiang na ka R. Lyngdoh, SMS (Agronomy), KVK Jaiñtia Hills kaba la pdiang sngewbha ïa baroh ki nongwan ïashim bynta.
Katba na ka liang ka kong S. Kynjing, District Agriculture Officer, West Jaiñtia Hills haka jingkren kala pynshlur ïa ki nongrep trai ri, ba kin pyndonkam hok ïa ki jingmyntoi bala ïoh na ka skim Pradhan Mantri Kisan Samman Nidhi (PM-KISAN) bad nalor kiwei de. Da kaba kyntu ïa ki nongrep ban kin shim ïa ka kam rep kam riang haka jingim da ka jingkyrshan lang jong ka sorkar.
Na ka liang ka kongsan jong kane ka sngi ka L.R. U Marak, MCS, Assistant Commissioner ka West Jaiñtia Hills District, kala ban jur ba ka rep ka riang ka dei u budlum jong ka Ri hi baroh kawei da ka jingthmu jong ka sorkar ban pynkhlaiñ ïa ka ïoh ka kot jong ki nongrep.
Shuh shuh kala pynpaw ïa ka jingdonkam jong ka rep ka riang hapdeng ka jingïatreilang bad ki tnad treikam, khnang ban weng ïa ki jingeh jong ki nongrep. Kala pynshlur ruh ïa ki nongrep ban pyndonkam ïa ka rukom rep katkum ka juk stad mynta bad kumjuh ïa ki lad jinghikai kiba ïoh lyngba ki KVK bad na kiwei de ki tnad sorkar.
Ïa ka prokram Technical Session la ai jinghikai da ka kong A. Khongwar, ADO, West Jaiñtia Hills, kaba la batai shaphang ka skim PM Kisan bad ki lad jingmyntoi kiba lah ban ïoh bad kumjuh ïa ka rukom aplai ïa ki.
Hadien ka technical session, la pyni ïa ka jingkren live jong u Myntri Rangbah duh ka Ri u Narendra Modi ha kaba baroh ki nongïashim bynta ki la ïashim bynta bad peit bad la pyni ïa ki mawjam ba kongsan bad ka jingbteng jong ka sorkar ban wanrah ïa ka bha ka miat jong ki nongrep.
Ha kane ka jingïalang la ïohi ban pynsngewthuh shaphang ki skim bad ki buit ki budia jong ka rukom rep ba kongsan haka District, la pynkut ïa kane ka prokram da ka jingai khublei na Dr. R Suchiang iba dei Subject Matter Specialist (AH&Vety.) jong ka KVK Jaiñtia Hills.
