Ka Krishi Vigyan Kendra (KVK), Jaiñtia Hills kala pynlong ïa ka ‘Kisan Samman Diwas cum awareness’ halor ka Viksit Bharat– G RAM G act, 2025 ha ka training Hall jong ka KVK Jaiñtia Hills, da ka jingthmu ban pynkiew ïa ka ri India ha ka rep ka riang lyngba ka jingpynkup bor ïa ki shnong.
La pynlong ïa kane ka prokram kum ka jingrakhe ïa ki Kisan Samman Diwas bad ka jingpynsngewthuh paidbah halor ka Viksit Bharat G RAM G act, 2026 ban ai jingtip ba kham bniah sha ki nongrep kumno ban kyntiew ïaka ïoh ka kot jong ka Ri ha ki sngi ban wan.
La sdang ïa ka jingïalang da ka jingkren plie na u Dr. Rimiki Suchiang, SMS (AH&Vety), KVK Jaiñtia Hills uba la ai ïa ka jingkren pdiang burom, ha ka juh ka por ula batai lyngkot sha ki nongïashim bynta shaphang ki jingthmu jong ka Viksit Bharat–Gram Gram. U la ban jur kumno ban pynbha bad pynneh ïaka rep ka riang da ki jingmut ba thymmai bad ban kyntiew ïa ka ïoh ka kot jong ki nongrep ka thaiñ.
Shuh shuh u Dr. Suchiang u la pynsngew sha ki nongrep halor ka jingdonkam ka Kisan Samman Diwas, kaba long halor ka jingaiti lut bad ka jingtrei shitom jong ki nongrep ban pyntikna ïa ka jingbiang ka bam ka dih bad ban pynkhlaiñ ïa ka ïoh ka kot ha ki thaiñ nongkyndong.
Ha kane ka sngi la pynlong ruh ïa ka jingïakren ban phylliew jingmut hapdeng ki nongrep bad ki stad saiañ bala shim bynta da ki nongrep. Ïa kane ka prokram la pynsngew lyngba ka All India Radio Jowai (Akashvani), shi bynta ban pynsaphriang ïa ki jingtip sha ki paidbah.
La pynkut ïa ka jingïalang da ka jingkut jingmut kaba thymmai jong ki nongrep ka thaiñ ban pynkhlaiñ da kaba shaniah halade hapoh ka jingthmu jong ka Viksit Bharat. Ha kane ka prokram kila don haduh 90 ngut ki nongrep kiba la wan ïashim bynta.
