Ki bor pynïaid jong ka Meghalaya Bharat Scouts & Guides, West Jaiñtia Hills ha ka 16 tarik bad ka 17 tarik u Jymmang kila pynlong ïa ka Rajya Puraskar Pre-Testing Camp ba ar sngi ha District Headquarter, Jowai.
Ha kine ki 2 sngi jong ka Camp ki Scouts Master bad ki Guides Captain na ki Unit bapher bapher kila wan ban ai ïa ki jingbatai bad ki jinghikai ïa ki khynnah Scouts-Guides shaphang ki bynta bapher jong ka Scouts-Guides Movement ba kynthup naduh ka rukom te tyllaih, (Knoting & Lashing), First-Aid, Compass-Mapping, Whistle Signal, B.P. Exercise, Camping-Hiking bad kiwei de ki bynta kiba ïadei bad ka Scouts-Guides Movement.
U Adiam U Bthuh, District Secretary ula pynsngew ba ka thong ban pynlong ïa kane ka Pre- Testing Camp ka long shi bynta ba ki khynnah kin nang ban pynjanai shuh shuh ïa ki rukom ban pynkhreh ïa ki Log Book haka rukom kaba janai, haka juh ka por ki Practical kin hap ruh ban leh hakhmat ki Examiner ne ki riew shemphang kiba wan na kiwei pat ki jaka.
Shuh shuh ula pyntip ki khynnah Scouts-Guides kiba lehbha ha kane ka Rajya Puraskar Testing Camp ka ban long ha State Headquarter Shillong naduh ka 19 tarik haduh ka 25 tarik 2024 kin ïoh ïa ki khusnam (Award) na U Lat ka Jylla ïa kaba la ju ai manla u snem ha u bnai October.
Na ka bynta ki khynnah Scouts-Guides kiba ïoh ïa kine ki Award kin ïoh lad ban leit ïashim bynta ban pynkhreh ïa ka Rashtrapati Award kaba long ka khusnam ba heh duh jong ki khynnah Scouts-Guides hapoh ka Ri India, ka ban aiti da ka President jong ka Ri India.
Ha une u snem ki khynnah Scouts-Guides kiba la pynkhreh ban ïaleh ïa kane Rajya Pursakar Award ki don kumba 24 ngut ki kynthei bad 12 ngut ki Shynrang.
