Kum shi bynta ban pynduna ia ka jingshah pynjulor ha ka jinglynshop ki bor mariang ka National Institute of Disaster Management (NIDM), Ministry of Home Affairs, ka sorkar India, ha ka jingiatrei lang bad ka Meghalaya State Disaster Management Aughority (MSDMA) bad ka Meghalaya Administrative Training Institute (MATI) ka la pynlong ia ka jingai jinghikai ba saw sngi halor ka Incident Response System (IRS)Basuc & Intermediate ha MATI, Shillong.
Ha kane ka training la wan ban iashim bynta da ki nongmihkhmat na ki District Disaster Management Authority, ki ophisar na ki tnad trei kam bapher bapher ka sorkar Meghalaya, ki nongmihkhmat na ka tnad Police nalor kiwei de kiba iadon bynta.
I kong M. War Nongbri ba long i Secretary, Revenue and Disaster Management Department bad Executive Director, State Disaster Management Authority ka sorkar Meghalaya, ha ka jingkren plie jong i la ong watla ka India ka la lah ban pyniaid beit ha ki por ba la leit haba wan lynshop ki jingjia ba sngewsih ha ka ri, hynrei dang don hi ki jingduna kiba donkam ban peit bniah bad ban pynbha.
U Shekher Chaturvedi, uba long u Assistant Professor, ka Division of Disaster Response & Recovery, NIDM, Delhi haba batai ia ka jingai jinghikai (training programme), u la ong ba ka training kaba la thaw dur bad pynwan dur ryngkat bad ka jingpyrkhat bad ban da leh hi da ki kam kan iarap ha kaban pynkhreh kumno ban pyndonkam ia ki rukom ai jingiarap ha ki por ba don ki jingjia kiba sngewsih. Shuh shuh kan kham pynlah ia ki tnad sorkar kiba peit ia kane ban pynlah ia ki ophisar jong ki ban ioh ia ka jinghikai katkum kaba ki dei ban ioh.
La synran lang ia u Chaturvedi da u Arun Verma, na ka Centre of Mass Congregation & Transport related Disaster, Division of Disaster Response & Recovery, NIDM, Delhi.
