Kum shi bynta ban rakhe ia ka sngi pyrshah ia ka jingdih drok bad ka jingkhaïi beaiñ, ka Press Information Bureau (PIB), Shillong, ha ryngkat ka jingiatreilang bad ka Ophis jong Commissioner, Customs (Preventive), NER Headquarters, Shillong hynne ka sngi ka 26 tarik Jylliew kala pynlong ia ka jingiakren bad ki lad pathai khubor hapoh ka lama ‘Varta’ ha CGST Hall, Shillong.
Kane ka prokram ka la wanrah lang ïa ki heh ophisar na ka tnad Customs bad ki dkhot jong ki lad pathai khubor na ka bynta ka jingïakren kaba bniah halor ka jingkiew jong ki jingma na ka jingkhaïi drok ha ka thaiñ shatei lammihngi bad ki lad pyntreikam ba la shim ban ïakhun pyrshah ïa ki.
Haba ai ka jingkren ha kane ka sngi u Joint Commissioner Custom u bah Spencer M. Mylliem, u la pynshai halor ki jinglong ba dang shen ha ka jingwan ki drok na ka ri ba marjan kum ka Myanmar, da kaba pynpaw kumno kane ka thaiñ ka nang pyndonkam kum ka lynti ïaid bad kumjuh ruh kum ka lynti pyndonkam ia u droks.
U la ong “Ka thaiñ ka sakhi ia ka jingkiew ha ka jingkhaïi tuh ia u drok, khamtam ia u drok amphetamine, uba la khaïi bunsien na Myanmar.
U Joint Commissioner u la pynshai ba ka Customs (Preventive) NER ka la pynkhlaiñ ïa ki jingpyrshang lyngba ki lad ki lynti bapher bapher ha kylleng ki jylla ka thaiñ Shatei Lammihngi. U la ong ka tnad jong ki ka shaniah shibun ha ki nongpyntip, bad ka jingiatreilang hapdeng ki tnad, katba u la bynrap ba ki ophisar jong ka Custom ha kylleng ka thain shatei lammihngi ki la leh ia ki jingkurup kiba kongsan ha ka jingiatreilang bad ki BSF, ki Assam Rifles bad ki bor pulit jong ka jylla, kaba pynlah ban pynlong ia ki jingtohkit lang bad ban buddien.
“Ka jingpyrshang pyntreikam jong ngi ka shong ha ka jingstad ha ka por bad ka jingiatreilang kaba khlaiñ bad ki tnad ba iatreilang. Ki jingialang man ka por bad ki jingtreikam lang ki long kiba kongsan bha,” u la bynrap
U bah Mylliem u la ban jur ba ki jingtreikam jong ka Custom, watla ki long kiba la pynjari da ka jingpyntreikam, hynrei ki kyrshan ruh da ki jingpynsngewthuh paidbah bad ka jingleit sha ki paidbah. “Ka jingthmu jong ngi kam dei tang ban tehlakam ia ka jingpynbiang hynrei ban pynduna ruh ia ka jingdawa.Ki buit treikam kiba jrong por ki dei ban kynthup ia ka jingpynbha, ka jingpynkylla ia ka ain, bad ka jingiatreilang bad ki paidbah”, u la ong. “Tang ki Custom kim lah ban ïakhun ïa kane ka thma. Ka donkam ïa ka jingkyrshan bad jingïatreilang kaba neh na baroh ki bor pynjari aiñ bad ki bor khappud, ha ka ri bad ha ka pyrthei.”
Ha kane ka sngi la don lang ki heh ophisar jong ka Custom ba kynthup ia u Deputy Commissioner u Shri Hajong bad u Assistant Commissioner u Shri Rasarshi Chakrabarty, nalor ki ophisar na ka PIB bad ki nongmihkhmat na ki lad pathai khubor bapher bapher.
Ha kane ka jingïalang ïakren la ïohi ïa ki jingkylli ba la buh halor ki lynti khaii pateng kiba dang mih, haba iadei bad ka jylla, ka jingdonkti jong ki bar jylla, ki kynhun shna tiar beaiñ, bad ki jingpyrshang ban ïatreilang hapdeng ki ri lyngba ki network kum ka Customs Overseas Intelligence Network. Ka jingkylli kaba kongsan ka dei kaba iadei bad ka ain ban iada na ka jingkhaii beain ia ki dawai pynbuaid bad ki dawai pynbuaid, 1988 (PITNDPS Act). Haba jubab, u bah Spencer M. Mylliem u la ban jur ba ka PITNDPS Act ka dang long ka atiar ain kaba khlain bha, khamtam ha ki mukotduma kiba iadei bad ki nongleh kam sniew kiba ju leh bad kiba don jingiadei bad ki kynhun khaii drok ba la pynbeit.
Kum shi bynta ban rakhe ïa kane ka sngi, ka Ophis jong ka Custom Shillong, ka la pynlong ruh ïa ka jingïakob thoh Slogan/Poster bad ïakop thoh poitri ha ka phang pdeng “Mission – Drug Free Campus.” Ki khynnah skul na ki phra tylli ki skul ha ryngkat bad ki samla kiba iashim bynta ha kane ka sngi rakhe pyrshah ia u droks.
