Ka kynhun jong ki Seng trei mon sngewbha ba la tip kum ka Bosco Integrated Development Society (BIDS) ha ryngkat ka jingiatreilang ki Samla Pule, ki nonghikai na ki College bapher bapher bad ki Pulit Pyniaid Kali jong ka Laitumkhrah ha ka 27 tarik Lber 2025 ki la pynsngewthuh ia ki kmie ki kpa jong ki khynnah skul halor kumno ban iada da kaba pynphong Helmet ia ki khun ki kti bad ka long ka jingshngaiñ ia ki khynnah skul.
Haba kren bad ki nongthoh khubor na ka liang u Inspector M. Myrboh u Pulit Pyniaid Kali jong ka Laitumkhrah Branch u la kyntu ia ki kmie ki kpa ban pynphong Helmet ia ki khun jong ki haba ki wan sha skul khnang ba kan long ka jingiada ban lait na kano kano ka jingmynsaw. U la ong ka jingim ka long kaba kordor haduh kata bad lada ki kmie ki kpa ki kheiñsting ka lah ban ktah ia ki khun ki kti.
Na ka liang u D. Gurung Coordinator jong ka Bosco Integrated Development Society u la ong baroh ki khynnah kiba shong ha ki kali 2 shaka ki dei ban pyndonkam ban phong ia ka helmet namar kan long ka jingshngaiñ ia ki khynnah haba ki shong ha ki 2 shaka.
Shuh shuh u la ong hadien ka jingmih hukum na u SP East khasi Hills ban pynphong Helmet ia ki khynnah ka la don ka jingkylla, ki paidbah ki la sdang ban pyndonkam ban pynphong Helmet ia ki khun ki kti jong ki.
Ha kane ka sngi ki la sam ruh ia ki helmet ia ki kmie ki kpa ban iada ia ki khun ki kti ha ba niah ia ki kali 2 shaka.
U ai khublei ia ka tnad Pulit, ki Samla Pule na ki College bapher bapher kiba la iashim bynta ha kane ka awareness Campaign halor ka Road Safety bad kumjuh ia ki kmie ki kpa jong ki khynnah kiba don ka jingsngewthuh na ka bynta ka jingshngaiñ ki khun ki kti. U la kyntu nangne shakhmat ia ki kmie ki kpa wat kumjuh ia ki ba niah ar shaka lada ki sngewthuh ban iada ialade ki hap ban pynsngewthuh lem ban ai jingiada lang ia kiwei.