Ka Reserve Bank of India (RBI) ka la pynlong ia ka Field Level Financial Literacy Event (FLFLE) ha ka 25 tarik u Lber, ha Nongtalang College, Nongtalang, West Jaintia Hills District, Meghalaya, kum shi bynta ban kyntiew ia ka jingnang jingstad ha ka liang ka pisa tyngka bad ban wanrah ia ka jingsngewthuh ha ki paidbah.
Ia kane ka FLFLE la plie pyrda da u Bah Olden Nongpluh, GM (O-i-C), RBI Shillong, ha kaba la don lang u Amarjit Behera, Regional Manager ka SBI, Principal ka Nongtalang College, DDM NABARD, Lead District Manager ka West Jaiñtia Hills bad kiwei kiwei ki heh sorkar bad ki nongtrei jong ka Bank na ka jylla.
Haba ai jingkren sha ki paidbah, u bah Nongpluh u la ban jur ia ka jingdonkam jong ka jingpyniaid ia pisa, ka jingpynkhreh ia ka mang tyngka shimet bad ka jingpynkhreh pisa lada jia kino kino ki jingjia ba kyrkieh ki bym lah ban tip lypa. U la pynshai ruh halor ka jingpyndonkam ia ka siew ka tda da ka digital, kaba pynsuk bad pynduna ia ka por, ha kajuh ka ïada na ki jingleh thok.
U Amarjit Behera, Regional Manager jong ka SBI, u la iaroh ia ka jingshimkhia jong ka RBI ha kaba kyntiew ia ka jingnang jingstad ha ka liang ka pisa tyngka ha ka jylla Meghalaya bad kyntu ia ki nongtrei bank ban hikai ia ki nongkyndong halor ki jingmyntoi ban ioh ia ka ram, kynthup ia ka KCC. U la pynshlur ruh ïa ki samla pule ban don ïa ki jingnang kumno ban kynshew pisa naduh kip or ka jinglong khynnah.
Kiwei de kiba la ai jingkren ki kynthup ia u District Development Manager ka West Jaiñtia Hills bad ki nongtrei jong ka Meghalaya Rural Bank, ki nongtrei jong ka RBI, Shillong ki la ai ka jingkren kaba bniah ha kaba pynsngewthuh ia ki nongiashim bynta halor ka jingdonkam bad jingmyntoi jong ka rukom pyniaid ne pyndonkam ia ka pisa. Kala don ruh ka jingkylli jingkylli halor kane ka phang ha kaba kut jong ka jingialang.
U Principal ka Nongtalang College u la pdiang sngewbha ia ki heh sorkar bad ki nongiashim bynta bad u la pynpaw ia ka jingmut bad ka jingthmu jong kane ka prokram ‘Field Level Financial Literacy Event’ bad kiwei kiwei ki jingpyrshang jong ka RBI ban nang pynjanai shuh shuh ia ka jingnang jingstad ha ka liang ka pisa tyngka.
