Ka Kyrmen Foundation ha ryngkat ka jingïatreilang bad ka Hawahoi Socio Development Society, Kiang Nangbah Government College Students Union bad ka Civil Blood Bank, Jowai, ha kane ka 17 tarik u Jymmang kila pynlong ïaka prokram noh synniang snam ne ka ‘Awareness programme and Blood Donation camp’, ha Kiang Nangbah Government College, Jowai.
Ka jingpynlong ïa kane ka jingnoh synñiang snam ka long shi bynta ban ai mynsiem ïa ki samla pule ba kin mih shakhmat bad ban tip ba ka jingsynñiang snam ka long kaba donkam eh na ka bynta kito kiba donkam kyrkieh ïa ka snam ha ka por ba jia ka shitom ka pang.
Ka Dr. P. Shylla, Senior Medical Office, Incharge Civil Blood Bank, Jowai haka jingkren kala ong ka jingsynñiang snam ka lah ban ïarap bad ban pynim ïa ki mynsiem ba kordor, ha ka juh ka por kala ai khublei ïa kane ka kynhun kaba la wan shakhmat ban ai snam kum ka jingai sngewbha na ka bynta kiwei.
Na ka liang ka kynhun jong ka ‘Medical team’ bala lam khmat da ka Dr. P.Shylla na Jowai Blood Bank kila wanrah lang ïa ki tiar ki tar ba donkam ban shim ïa ka snam, ha kaba la don haduh 20 ngut kiba register bad napdeng kine ki don 15 ngut kiba lah ban synñiang ïa ka snam jong ki.
Ha kane ka sngi la donlang naduh ka Dr. Easter Meena Blah, Principal Kiang Nangbah College, Jowai, ka kong Semi Khongthiang, Secretary Kyrmen Foundation, ma Fedrick Synnah, Hawahoi Socio Development Society, samla Evermore Rymbai President, KNGCSU kiba la ai jingkren kynjuh shaphang ka jingdonkam ban synñiang snam.
