Hapoh ka jingialam jong ka Seng Rangbah Katholik St. Theresa Cathedral Jowai la pynlong ha kane ka 08/05/2025, ka sngi burom ki longkpa Katholik jong ka Parish Jowai ha kaba palat spah ngut ki longkpa ki la iawan shim bynta ha kane ka sngi burom ki longkpa kaba shisien shisnem. Ia kane ka jingrakhe la pynlong ha Vienney Hall Marianhill Jowai, ha kaba u Phadar Augustine Lamin, Vice Principal ka Marianhill Higher Secondary School u long u Nongsneng u Nongkraw bad u Nongkyntu kynpham ia ki longkpa.
U Phadar Augustine Lamin haba kren ha kane ka sngi, u pynpaw ia ka jingkmen haba u la iohlad ban burom bad ia kmenlang bad ki longkpa. Haba kren ha kane ka sngi u ong kane ka sngi burom jong ki longkpa mynta ka sngi ka iahap bad ka jingkmen jong ka Balang naba ka Balang ka rakhe ia ka sngi ka jinghiar jong u Mynsiem bakhuid halor ki Apostol kaba dei ruh ka sngi kha jong ka Balang, ka sngi ha kaba U Jisu U thehsei ia u Mynsiem bakhuid halor ki Apostol, ka sngi ha kaba la pynkylladur ia ka jingim jong ki Apostol na ki briew kiba long ordinary sha ki briew kiba long ki Paia ba Radbah jong ka Mishon (Mission) u Jisu bad ka Balang jong u ha satlak ka pyrthei.
Haba phai sha ki longkpa u Phadar Augustine u ong lyngba kane ka sngi burom jong phi to nangpynkylla dur ia ka jingim jong phi na ka babha sha kaba khambha shuh shuh. Nangta u ong ki longkpa ki long ki Rishot bakhlaiñ jong ka ïing ka Sem, jong ka Balang, jong ka Ri bad ka Jaitbynriew. U ban shuh shuh da kaba ong “Ko longkpa to kup da u Mynsiem bakhuid jong U Blei bad haba shah ialam da u Mynsiem bakhuid jong u Blei phin salah ban tip ia kiei kiei kiba rieh, kiba jylliew jong u Blei ki ban pynmih ia ki soh jong ka jingieid ia u Blei, ia ka kmie ki khun, ia ki khun ki ksiew, ia ka Balang bad ia ka jaitbynriew. Ki longkpa ki donkam ban shah ialam da u Mynsiem bakhuid bad hapoh ka jingialam jong u Mynsiem bakhuid, yn salah ban pynmih ia ki soh jong ka jingieid, ka jingkmen, ka jingsuk, ka jingiaishah, ka jingsbun, ka jingkylluid mynsiem, ka jingngeit, ka jingjemnud, ka tipbriew tipblei bad ka kam imlang sahlang hapdeng ki parabriew.
Ha kane ka sngi la ioh ruh ia ka jinglehburom ia ki longkpa da ki jingshad bad ki jingrwai da ki khynnah Convent jong ka Sacred Heart Convent Mihmyntdu, da ki khynnah St. Mary Mazzarello Convent bad na ki khun samla jong ka CMC Iawmusiang-Khimusniang.
Ha shwa ka jinglehburom ia ki longkpa la don ka jingknia Mass Iukharist bakhuid kaba la pynmynta da u Fr. Augustine Lamin ha kaba baroh ki longkpa ki iashim bynta ha ka ia bam ka iasip ia U Kpu Uba la pynkyntang kaba long ka Met bad ka Snam jong u Jisu Khrist. La pynkut ia kane ka sngi da ka jingkyrkhu da ka Sakrament bakhuid tam ka Duwan.
