Ka West Jaiñtia Adventure & Cycling Association (WJA&CA) ha ryngkat ka Meghalaya Cycling Association mynta ka sngi saitjaiñ 13 tarik u Naitung kala pynlong ïa ka State Selection Trial ha Jowai Khliehrymphum, shi bynta ban jied ïa ki nongñiah Bicycle napoh ka District ban ïashim bynta haka MTB Championship 2024 ka ban long ha u bnai ban wan.
Ha kane ka sngi na ka liang ki khun samla lem bad ki khynnah kiba don ka sap ñiah bicycle kila wan ban ïashim bynta lang, ïa kane ka State Selection Trial la wan ban ai mynsiem ïa ki nongiashim bynta da u Aibanmanbha Shullai, Waheh Chnong Ladthadlaboh, u Rtn. Rudolf E. Laloo, President Rotary Club Jowai bad u Stranger Lamare, Waheh Dong Khliehrymphum, katba u Biangpor Shylla, President West Jaiñtia Adventure & Cycling Association haka jingdonlang ki dkhot ka Meghalaya Cycling Association hashwa ban sdang ula ai ki kyntien lamkhmat halor ka thong jong kane ka jingïakop ñiah Bicycle.
Ha kane ka jingïakop la phiah ha ki kyrdan ba kynthup ïa ki Junior, Sub-Junior, Youth, Elite Men & Women, ki nongjop ha ka Junior ki long u Dalenmi Sana, Riboklang Lyngdoh Nonglait bad u Hubat Chuangsha M. Marak, ha ka Sub-Junior la jop da u Daohi Dkhar, u John Rodrick B. Shadap bad u Mark Amazing Khyllait. Ha ka Elite Men la jop da u Kevinjohn Khyllait, u Lambormi Phawa bad u Sharailang Basaiawmoit. Ha ka Elite Women la jop da ka Phyrnai Kyndait, katba ha ka kyrdan Youth la jop da u Kevin Lyngdoh Sangriang, Ewandame Mark Syiemlieh bad u Kerry Wahlang.
Na ka liang u Biangpor Shylla ha ka jingkren ai khublei hashwa ban sam ïa ki syrnod ula pynsngew kiba jop ha kane ka jingïakop jong ki kyrdan bapher bapher kin ïoh lad ban leit mihkhmat ïa ka jylla bad kin hap ruh ban leit pyntbit ïa ka sap hashwan ban ïashim bynta ha ka MTB Championship 2024 ka ban long ha u bnai ban wan.
La pyntip kiba ïoh rah ïa ka nam Gold Medal ka MCA kala kular ban kitkhlieh ïa ka jinglut jingsep jing ki da ka jingïarap ka seng, kumjuh ïa kiba ïoh Silver Medal haduh 50% yn kitkhlieh ïa ka jingiarap katba kiba ïoh Bronze Medal haduh 25% yn ai jingïarap i=ïa ka jinglut jingsep jong ki.
Shuh shuh u ma Biangpor ula ong nangne shakhmat ka West Jaiñtia Adventure & Cycling Association kan pynlong ïa kum kine ki jait jingïakop hapoh ka District, khnang ban yn lah ban sei pyrthei ïa ki khun samla kiba don shisha ïaka sap ban ñiah Cycle napoh ka Ri Loom Jaiñtia.
