U District Magistrate ka West Jaiñtia Hills District u bah B.S Sohliya, IAS, ula pynmih biang sa kawei ka hukum ha ka 30/09/2024 kaba hapoh ka Section 163 BNSS kaba long ruh shi bynta ban bteng ia ka jingtreikam jong ka Office Order Under Section 144 CrPC Dt.26/06/2024.
La hap ban pynmih ia kane ka hukum ka long hadien ba la lap ba ka jinglong jingman jong ka um ha ka Wah Myntdu bad ki shnat wah jong ka, ki la kylla ktieh na ka daw jong ka jingwan tuid jong ki jaboh.
La lap ruh ba ka dang don ka jingbteng jong ka jingtih bad khlong maw be-aiñ ha ki rud jong ka wah Myntdu.
La pyntip ba na kane ka daw kala wan rah ka jingjaboh jong ka um dih kaba la pynpoi sha ki thliew ïing jong ki nongshong shnong ka nongbah Jowai.
Kumta na ka liang jong u DM ula pynmih ia katei ka hukum U/S 163 BNSS ban khang pyrshah ia ka jingtihmaw ha baroh shi lynter jong ka Wah Myntdu. La khang ruh ia ka jingshait jaiñ, sait kali, ka jinglumthup ia ki jakhlia (Solid/Liquid) ha ki bynta jong ka Wah Myntdu. La khang pyrshah ia ka jingbret pathar ne lumthup ia ki jakhlia kum ki diaper bad ki sanitary pads ha ki bynta bad ki rud jong ka Wah Myntdu.
Kane ka hukum kan treikam naduh ba la pynmih ia ka ha ka 30/09/2024 tad haduh ban da pynmih da kawei pat.