Ka tnad pule puthi jong ka sorkar jylla lyngba ka Directorate of Educational Research & Training (DERT) mynta ka sngi ka la pynmih ia ka Result jong kito ki samla kiba la ialeh ia ka Examination jong ka Meghalaya Teacher Eligibility Test (MTET) 2021.
Kane ka Result kaba la pynbna mynta ka sngi ka dei kaba la pynialeh da kane ka tnad DERT na ka bynta ka kam nonghikai ha ki Lower Primary bad Upper Primary School hapoh ka jylla kaba la pynialeh ha ka 9 tarik u October mynta ka snem.
Baroh kiba la iakhun ia kane ka Exam (MTET) ha ka Paper I jong ki Lower Primary ki don 23,124 ngut, na kine kiba la pass ki long tang 3561 ngut kaba mut tang 15.40 %
Katba kiba iakhun ia ka Exam (MTET) Paper II jong ki Upper Primary ki don 12,090 ngut, na kine kiba la pass ki long tang 3172 ngut ne 26.24 %
Ki samla kiba la pass ia kane ka Exam ki dei ban pynpoi ia ki kot ki sla ba donkam jong ki sha ki Examination Centre jong ki na ka bynta ban ioh ia ki Certificate jong ki.
Ia ka jingtip ba bniah lah ban leit ha ka website http://megeducation.gov.in/dert/results/2021