Ka Sub-Divisional Magistrate (SDM) jong ka Sohra Civil Sub-Divisional kaba dei ha kajuh ka por ka Returning Officer jong ka 26-Shella (ST) Assembly Constituency bad ka 28-Sohra (ST) Assembly Constituency ka Hema Nayak, IAS kala pynmih ia ka hukum katkum ka kyndon 144 CrPC na ka bynta ban pynlong ia kane ka elekshon kaba iaid beit iaid ryntih bad kaba shngaiñ hapoh katei ka Sub-Division.
Ki jingmana bala pyntreikam ha kane ka kyndon 144 CrPC ka long ba la khang ban pynlong ia kino kino ki kynja jingiakhih pyrshah la ka dei na ki riew shimet ne na ki seng ne kynhun. Yn ym shah ban don kino kino ki jingthoh ne ki jingdro dur ha ki kynroh ïing briew ne ki kynroh surok paidbah. Hynrei la shah tang ia kito kiba la iohbor na ki trai ïing ne trai jaka ryngkat ka jingiohbor na ki bor pyniaid Sub-Division.
La khang ruh ban pynlong ia kino kino ki jingialang paidbah ne ki rally khlem da ioh bor. La khang ruh ban pynsawa ia ki kor pynsawa naduh ka por 10:00 PM haduh ka por 6:00 AM.
Ha kawei pat ka hukum la pynmih ba la khang ia ka jingrah pisa jong kino kino ki riew shimet ne ki kynhun palat ia ka Rs.50,000/- (Sanphew hajar) tyngka.
Lada lap ia kino kino kiba pynkheiñ ia kane ka hukum kin shah pynshitom kat kum ki kyndon jong ka aiñ.