Ban pyllait na ki jinglumthup jong ki jakhlia ne ki ñiut kiba mih lyngba ki iew kum ha Iawmusiang bad Iawthymme kaba la wanrah ia ka jingsma jingtung bad kaba lah ban ktah ia ka jingkoit jingkhiah jong ki paidbah nalor ba kala pynthut ruh ia ka iaid ka ieng jong ki kali motor, mynta ka sngi u District Magistrate jong ka West Jaintia u ma Garod LSN Dykes, IAS, ula pynmih da ka hukum kaba tyngeh hapoh ka kyndon 144 CrPC ban pynshitom ia kino kino kiba ieng pyrshah ia kane ka jingthmu jong ka sorkar ban pynkhuid noh ia kine ki ñiut ki ñier.
Katkum ka hukum sorkar kaba la pynmih mynta ka sngi na ka ophis u Deputy Commissioner ka West Jaintia Hills District la iathuh ba ki ar tylli ki tnad sorkar ba kynthup ia ka Jaintia Hills Autonomust District Council (JHADC) bad ka Jowai Municipal Board (JMB) ha ryngkat ki bor pyniaid District kila iashong jingialang ba kyrkieh, kila shim ia ka rai ban leit breh noh shipor ia ki jakhlia kiba la neh sah da ki bnai ha Iawmusiang bad ha Iawthymme ha ka jaka jong ka JHADC ba don ha Khliehtyrshi ia kaba la tip kum ka Pangit.
Ha kaba iadei bad kane u District Magistrate ula pynmih ia ka hukum 144 CrPC ban pyntreikam lada don kino kino kiba ialeh pyrshah ne kiba thmu ban khanglad ia kane ka jingthmu jong ka sorkar.
Kane ka hukum kala bthah ia ka JHADC bad ka JMB ba ki dei ban pynkhuid noh mardor ia ki jakhlia kiba don ha kitei ki ar tylli ki iew. Lada don kino kino kiba pynwit ne pynthut ia ki briew jong ka JHADC bad JMB kin ngat beit ha ki jingpynshitom katkum ki kyndon jong ka aiñ. Yn ym shah ia kano ka jingialang briew kaba palat ia ki san ngut hapoh ka 2 km na katei ka jaka (Pangit, Khliehtyrshi).
La khang ruh ia kino kino ki briew ban rah ia ki tiar pynmynsaw bad ki suloi hapoh ka jingjngai kaba 2 km na katei ka jaka ba thmu ban theh ia ki ñiut (Pangit, Khliehtyrshi). Hynrei kane ka hukum kam khang ia Pulit ne ki briew jong ka aiñ ban rah ia ki suloi jong ki.
Kane ka hukum kan treikam noh naduh bala pynmih ia ka tad haduh ban da pynbna da kumwei pat.