Mynta ka Sngi ka 25/06/2024 ka Jaiñtia National Council (JNC) haka kyrwoh na u President rangbah bah Sambormi Lyngdoh u la pynpaw iaka jingsngewsih kaba khraw halor kato ka jingjia kaba la jia haka shnong Kuliang, East Jaintia Hills, ha kaba kawei ka longïing kala shah thombor ha ki BSF kaba la jia haka miet jong ka 19 tarik bad haduh mynta ym lah ban kem iaki.
U bah Sambormi Lyngdoh haba ai jingkren ula ong ba haka jingshisha ka sorkar India haba ka buh ia kano kano ka ktem BSF ka dei beit naka bynta ban peit pyrman iaka border bad ban tehlakam ruh iaka jingwan rung jong ki bar ri, hynrei kumba la sakhi ha kine ki sngi ba mynta, ba pleng kam shym la long satia kumba ka dei ban long.
“Ngi buh ka jingkylli ba lada ki bar ri (Khar Bangla) ki ioh ban rung shapoh u pud jong ngi te hato ym dei mo ka kamram ne ka jingbahkhlieh jong ki BSF?, bad sa kawei ruh lada don ki bar ri kiba iohrung shapoh shnong ne khap shnong hato ka kamram jong ki BSF ban leit kem? Kata ruh shiteng synnia?. naka liang jong ngi, ngi ong ba kadei ka jingtroin (failure) ka treikam Jong ki BSF ba sa iohrung ki bar ri” ong u President ka JNC.
Shuh shuh u bah Sambormi u ong ba kaba sngewphylla ruh ba kumno ki BSF ki leit rung shapoh shnong khlem ka jingsynran lang ki pulit ne ki nongialam shnong bad kaba phylla ruh ba ki kam ialade ki on duty kata haki jaiñ ïing (Civil Dress) khlem ka uniform. Katkum ka aiñ lada don kano kano ka case pyrshah iano iano ha kaba iadei bad ka kam border ki BSF kidei ban pyntip shwa iaki pulit bad iaka infiltration ban ioh leh iakaba donkam hynrei kim shym la leh kumta, ki la leit rung jubor nalor saka tim sih bad ka rah tiar pynmynsaw. Shu donbok ba kam da jia kano kano ka jingmynsaw jur iaki namar khlem ka uniform mano ban tip udei uei. Ka kam jong ki BSF kadei ban iada hynrei ki long pynban ki dieng pynkiang iaka shongsuk ka imsuk ki nongshong shnong, bad haduh mynta iakine ki BSF ngim juh iohi baki kem lane bat iaki bar ri, hynrei ngi juh iohi baki siat iaki nongshong shnong bad ki pynthut iaka leit ka wan dakaba talasi pathar wat iaki longkmie ki khynnah.
U bah Sambormi u la kyntu jur ruh ia kato ka longïing ba shah ktah ba kim dei ban ngop ha kino kino ki buit jali jaum jong ki BSF ban withdraw ia ka case hynrei dei ban iaid beit shakhmat ban ioh iaka jingbishar kaba hok. Naka liang jong ka seng ruh khlem da shong kli kti ka la leit ban iakynduh markhmat bad u SP ka East Jaiñtia Hills bad ula iathuh haka seng ba ka jingtohkit ka dang iaid shakhmat bad la aiti ruh ha u DSP jong ka crime EJHD ban leh iakaba donkam, u SP u la iathuh ruh ba kiba donkti kila shah register hapoh ka POCSO.
Naka liang u President ka JNC u la ban jur iaka tnat pulit bad ka dei ban leh iakaba donkam tam, kata ban kem noh shisyndon khlem da leh shiliang bad ban wanrah ruh iaka hok katkum ka aiñ, namar ka aiñ ka trei salonsar ym tang ia u rit u ria ne uno uno u nongtrei sorkar ne u shipai ne u pulit.
“Ka kyrwoh kaba shai ngi phah sha ki bor jong ka aiñ ba, lada ym lah ban kem ia ki BSF bad ym lah ruh ban leh iakaba donkam eh, te kan sa poi ka por ba ka seng bad ki paidbah hi baroh ka thaiñ ngin sa shim daka sienjam kaba eh ba wat la ka ktah iaka imlang ka sahlang ne ka shongsuk ruh namar kum ki paidbah nongshong shnong ngim lah shuh ban shah ia kum kine ki jingthombor haki jaka lajong” ong u President ka JNC bah Sambormi Lyngdoh.