Ka Khasi Student’s Union Hingaria Unit , East Jaintia Hills District ka pynpaw ia ka jingsngewnguh ia ka sorkar halor ka jingshimkhia ban pynlait ia ka Preliminary Work Order na ka bynta ban shna ia u surok ba dang sahteng na ka shnong Lama shaduh Wah Prang Hingaria bad ban maramot ia ka jingkieng ha ka wah Pusi ka jingkieng ba pyniasoh ia ki Shnong ka West bad East Jaintia Hills.
Kum ban shu pyn kynmaw ba ka seng hapoh ka jingialam u Samla Garnes Talang General Secratary jong ka seng ryngkat bad ki nongialam shnong jong kitei ki thaiñ ba khynthup ia u Samson Lamin Rangbah Shnong Hingaria, Kyrmen Swer Rangbah Shnong Borghat, Lap Suchen Rangbah Shnong Natbor bad u bah D Lamare myn ha ka 17 tarik u Jymmang ki leit ban ai dorkhas sha u Chief Engineer PWD (Rds) Central Division, Shillong, ban kyntu ban maramot noh ia u surok u ba la joit rathai naduh na Lama shaduh Wah Prang Hingaria namar ka la buh jingeh shibun ia ki paidbah nongleit nongwan jong ka thaiñ khapud hi baroh kawei, ha ka jingbuddien jong ka seng, klem sangeh na ka liang ka sorkar ka lah pynurlong bad sanction 16 klur tyngka ban Maramot bad ban shna ia u surok naduh ka shnong Lama shaduh Wah Prang Hingaria nalor kaba la sanction lypa bad ka jingtrei ka dang iaid shait shait naduh Wah Prang shaduh Sonapur kaba kot 126 klur.
Kumta halor kane bynta, ka seng ka sngew dei ban ai khublei kyrpang ia u Chief Engineer bad kumjuh ia ka Local MLA kiba la shim khia ia kane ka jingud jingnam jong ka seng ha ryngkat bad ki nongialam shnong jong ka thaiñ, ba lyngba kane ka surok ki Shnong khap-pud ba khynthup naduh ka Shnong Lama, Borghat, Natbor, Demlakang, Pdeinwah Khynriam, Kwator, Hingaria, Huroi, Lahalein, Ljailong, Lejri ter ter shaduh Sonapur.
La ong ruh ba ka jing sniew palat jong kane ka surok ha kine ki snem ba lah dep ka lah wanrah jingeh shibun ia kitei ki nongshong Shnong kiba hap ban mad ha ki ba bun ki jingeh la ka dei ha ka leit ka wan khamtam ha ka pang ka shitom ban pynkit sha ki jaka sumar nalor ba jngai ki jaka sumar kin hap ruh ban mad ia ka jingeh na ka jingbymdon u surok ba bha. Kaba kham sngew sih ka long ba ka lah don teng ka jingduhei ia ki Mynsiem briew tang ha shiteng lynti ban poi sha ki jaka sumar.
Lyngba kane ka kyrwoh ba la wan na u Samla Aadrias H.L. Talang Publicity Secretary KSU Hingaria Unit, ka seng ka buh ruh ka jing kyrpad ia ka sorkar bad khamtam ia i MLA ba donburom ban buddien bad ban bthah ia u contractor ba dei ban pyntrei ia kane ka projek ba kin pynkloi ia ka kam ban pyndep noh ia u surok naduh ka Shnong Lama shaduh Sonapur ha kine ki bnai Tlang.
