Ka Synjuk Waheh Shnong East Jaintia Hills District (SWSEJHD), ha ka 11 tarik mynta u bnai kala leit ban buh jingthoh sha u Myntri ba dei khmih ia ka tnad ka koit ka khiah u ma Wailadmiki Shylla na ka bynta ban pynpaw ia shibun ki jingdonkam kiba dei ban pynbiang ha ki jaka sumar kiba don hapoh ka District bad ruh ban dawa kyntiew kyrdan noh ia ka Pamra Paithlu PHC sha ka CHC.
Ka Synjuk ka la ioh ban kdew ia ki jingeh bad jingduna jong ki jaka sumar kiba don hapoh ka East Jaintia Hills District kiba kynthup ia ka Khliehriat Civil Hospital. La pynpaw ha kane ka Hospital ka dang donkam ban don ia ki Doctor kiba la pyntbit (Specialist) kum ha ka liang ka Obstetrician & Gyneologist, Anesthesiologist, Surgeons, Psychiatrist, Orthopedic, ENT Specialist bad Ophthalmologist.
Katba ka Sutnga CHC pat ka donkam ban don ia ki F.R.U. bad ka jingmaramot ia ki jaka sah (Quarter) jong ki nongtrei kane ka CHC kila la jot mynta.
Ha kaba iadei bad kiba bun ki PHCs bad ki Sub-Centres kiba don hapoh ka District ki don shibun ki jingduna ba kynthup ia ka Um, ka bor ding elektrik bad ki surok. Kum ka Maullian Sub-Centre ka donkam ban ioh ia ka transformer bad ka Saipung PHC sub-centre ka donkam ban shna pynbha ia u surok ban poi sha kane ka Centre.
Ha ka juh ka por ka Synjuk ka dawa na u Myntri ban kyntiew kyrdan noh ia ka Pamra Paithlu PHC sha ka CHC ba pura. Ka jinglah ban kynkiew kyrdan CHC ia ka Pamra Paithlu PHC kan iarap shibun ban ai ka jingshakri kaba bha shah ki 21 tylli ki shnong ba ka dei peit.
Ka Synjuk ka dawa ruh ban thaw thymmai kawei ka PHC ha ka thaiñ Mukha-Ialong lane ha Cham-cham SC, khnang ban pynbha shuh shuh ia ka jingshakri jong ka tnat ka koit ka khiah ha ki thaiñ nongkyndong, pynpaw ka Synjuk.
Kumta ka Synjuk ka buh ka jingkyrpad jur ia u Myntri ka Koit ka Khiah ma Wailadmiki Shylla ban shimkhia ia kine ki mat jingdawa jong ka Synjuk na ka bynta ka jingbha jingmiat jong ki nongshong shnong ka thaiñ.
