Ka Dorbar Mang Tyngka jong ka Jaiñtia Hills Autonomous District Council (JHADC) kaba la bteng mynta ka sngi Palei kala long kaba ïaid beit ïaid ryntih, da ka jingiashim bynta lang ki MDC na ka liang pyrshah ban ïatai sani ïa ka Mang tyngka bala wanrah da u CEM ka JHADC ma T. Shiwat kaba duna ïa ka jingpyllut da 11.32 klur tyngka.
Kane ka mang tyngka jong u snem 2025-2026 ka kynthup ïa ka jingïoh kaba T.245,90,55,900/- (Arspah sawphew san klur khyndaiphew lak sanphew san hajar khyndai spah) tyngka, katba ka jingpyllut pat ka kot sha ka T.257,23,44,200/- (Arspah sanphew hynñiew klur arphew lai lak sawphew saw hajar ar spah) tyngka bad kane ka paw ba ka jingpyllut ka heh ban ïa ka jingïoh haduh T.11,32,88,300/- (Khadwei klur laiphew ar lak phra phew phra hajar lai spah) tyngka.
Na ka liang ki MDC jong ka VPP kiba don baroh 8 ngut bad 2 ngut na ka Congress kiba don sha ka liang pyrshah kila shim bynta lang mynta ka sngi ha ka jingïatai ïaka mang tyngka, kila pynpaw ba kane ka Mang Tyngka ka Council kam long satia kaba biang pura. Kumta kila ai jingmut ïa ka Executive Committee halor ki lad ki lynti ban pynmih Revenue ïa ka Council lyngba ki Policy treikam naduh ka rukom lum khajna na ki kharkhana lyngba ki Monitoring Gate, ki Check Gate, ki ïew ki hat, ki jaka jngohkai pyrthei, ka jingpynbha ïa ka Riti ka Dustur, nalor kiwei kiwei de.
Shuh shuh kitei ki MDC naduh u ma Awhai Andrew Shullai uba dei ruh u nongïalam ka liang pyrshah ula pynpaw ka jingpyrshah jur ïa katei ka mang tyngka jong ka JHADC kaba la pynpaw tang ïa ki kam ba rim kiba ka Council kala dep leh, khlem da don ki kyndon aiñ ba thymmai, ula ong wat ïa ka aiñ ban ithuh ïa ki kur ym shem la wanrah ha kane ka mang tyngka.
Ula kynthoh ruh halor ka jingthmu ban thied kali ka Council kaba la kot sha ka shiklur tyngka, ula ong ba kane ka long tang ban pynsyrwa kai ïa ka pisa nalor ba la don lypa ki kali kiba biang.
Shuh shuh ula kynthoh ïa ka EC kala la bteng ïa kane ka kam thung Chiarman kaba hap ban siew tam (extra) nalor ka tulop jong ki, ula ong la dei ban pynduh noh ïa katei ka jingsiew extra. Ula ai jingmut ba ka Council ka dei ban pynleit jingmut na ka bynta ki ïew ki hat ha ka rukom pynmih pisa, ha kaba u pynkut ïa ka jingkren u ong kane ka Mang tangka bala wanrah da u CEM kam dong jingkyrmen satia.
U ma Madonbai Rymbai ula ong kane ka mang tyngka kam don satia ïa ka lawei, u kyrmen ha kane ka Financial Year ka ban wan ka sa don ka jingkylla na ka bynta ka jingbha ka Council. Ula ong ha jaka ban pynlut ïa ka pisa ban thied ïa ki kali la dei ban pyni ïa ka jingtei ïaka Iawmusiang kaba ïaid shakhmat mynta, u kyrmen ba kane ka ïew kan dep noh kloi na ka bynta ka jingmyntoi jong ki paidbah ka Ri-Lum Jaiñtia.
Na ka liang u CEM ka JHADC u ma Thombor Shiwat ula buh ka jingkyntu ïa baroh ki MDC ban don ka jingïatreilang na ka bynta ka burom jong ka Council, ula pynsngew ruh kino kino ki mat ba donkam na ka bynta ka Council yn sa pyntreikam da ka jingïasngewthuh jingmut lang. Shuh shuh ula kyntu ïa baroh ki para MDC ban monjur lang ïa ka Mang tyngka jong u snem 2025-2026, ïa kaba yn passed lashai ka sngi 28 u Lber, 2025.
