Ka seng Pnar Students Movement (PSM) ha ryngkat ka jingdonlang ki nongrep ba ri syiar kila bat ia ki truck bad kali Pick-up kumba 6 tylli kiba kit bad shalan ia ki Syiar shapoh ka West bad East Jaintia Hills District.
Kane ka jingpynphai ka PSM ia kitei ki kali ka long hadien ba la ioh jingtip ba don ki kali kiba thmu ban shalan ia ki Syiar shapoh kine ki district. Kumta ka PSM ryngkat bad ki nongri Syiar na Jaintia kila mih ban bat ia kine ki truck bad Pick-up.
Ha ka jingtohkit ka PSM ka la lap ba kine ki kali kim don satia ia ki Challan kumjuh ruh ka Medical Report ha ka jingiadei bad ki syiar la ki dei kiba koit ne kiba don jingpang, ha kaba ka seng ka la lap ba ki syiar kiba kine ki kali ki kit ki dei ki syiar kiba danglung suda kiba don kumba 1.5 Kg lane 2.5 Kg ei ei.
Ha ka jingiadei bad kane ki nongdie syiar kiba donlang ki la ong ba kum kine ki syiar tang ka Vaccine lane ka dawai injek ruh kam pat kut.
Ka seng ka la pynpaw ia ka jingsngewkhia halor kane ba kine ki nong shalan syiar ki shalan da kum kine ki jait syiar sha ki thaiñ kiba tang ka dawai injek ne vaccine ruh kam pat kut.
Na ka liang ki nongrep ki la ong ba ka jingwan jong kine ki syiar na bar jylla ka pyntlot bor ia ki nongri Syiar ka thaiñ ban iaid shakhmat haka kam khaïi syiar.
Haba ka seng bad ki nongri ki la thmu ban pynphai pat ia kine ki kali kit syiar don pat ki briew kiba wan ban kam trai ia kine ki syiar, hynrei hadien ka jingiakren la lap ba kine ki briew ki dei tang kiba shu shah kyrteng, hynrei kim dei shi sha ki trai jong kine ki syar.
Ka seng bad ki nongrep kumjuh ruh ki nongri Syiar jong ka thaiñ da kawei ka jingmut ki la shim ia ka rai ban phah pynphai biang ia kine ki kali kit syiar da kaba bud ryngkat haduh ban da poi ka shnong Saphai khappud bad ka jylla Assam.
Ha ka juh ka por ka PSM ka la kyntu ia ki supplier ban shim shwa ia ki syiar kiba don hapoh ka thaiñ hi, khnang ban ai mynsiem ia ki nongri syiar bad ki nongrep hapoh ka Ri-Lum Jaiñtia.
